蛇哥係仰般死个？

【文／陳淑芳（現任客語老師／臺北市民生國中退休的國文老師）】

 

       有一條性體當壞癖，毋過生著十分緣投又已靚个大白蛇，佢長年透天歇在一間耕種儕个舊倉庫裡肚个壁壢角，過等天轉笠嫲花──安然自在个日仔。

     有一暗晡，佢出空來尋食，堵著主人散放在地泥頂項个鋸仔，佢行路拂尾時節，尾項略略仔著仔傷、流一滴仔血、有一息仔痛，佢嗄發大譴到膦火盡猛，歸身仔脹到險險會噼忒，擘開嘴「嘶~嘶~~」大嫲牯聲噦噦喊：「到底係哪隻鬼仔，摎捉怪到恁仔？定著無放過佢。」蛇哥心肝肚愐，無論如何佢愛尋出這搣衰佢个冤仇人！

    故所，佢歸暗晡，在暗摸胥疏中央，用忒歸身个氣力，跈等該支硬弳弳、尖牙利齒个鋸仔捩捩轉，轉啊轉啊轉到天光。

    第二朝晨，耕種人看著一條肥固固仔个大蛇哥歸身血漬漬仔、軟怠怠仔摎生鹵个鋸仔膏膏纏做共下。這耕種人講實在佢丈二羅漢──摸毋著頭那，在心肝肚緊愐也想無計：

   

「這大蛇哥到底係仰般死个？」

陳淑芳攝影

 

▲BACK