勤於筆耕的客家文學創作者──張捷明先生專訪(3)

【文：徐碧美 國立中央大學客家語文碩士班畢業生】

 

已經創作十餘本客語文學書，得獎無數的張捷明先生，談到豐富的創作經驗，張君說：

在客語文學个創作路上，自家一路緊行，成時煞猛，成時賣懶好(hau喜歡)搞：煞猛行个時節像seˇ螺仔(蝸牛)，腳下畫過路有痕，一痕一痕畫成文學地圖，一本一本个文學地圖帶領細人仔行入好(hoˋ很好)搞又迷人个客語文學森林中。成時拈揚尾打草蜢，停妥賣懶个時節又乜東看看西看看，路邊花草記在心中，像庄下个水牛四隻胃，先放等慢慢消化，正慢慢轉換為營養。

我个文學創作係從兒少文學開始个，這幾年也漸漸學寫新詩、散文摎小說，當然啦，乜係盡多熟識毋熟識个先生指導過我，正會緊進步个。寫作係一種創意表達摎感受，無一定愛拿出來比賽，毋過透過比賽還係算盡好个鼓勵，摎得著觀摩个機會。這幾年參加幾屆个教育部閩客語母語文學獎，摎各縣市政府（台北市墨客、台南市、屏東內埔、屏東大路關、桐花獎）所舉辦个母語文學獎，得著幾擺新詩、散文、小說个頭獎獎勵，尤其係有一篇寫吾家鄉歷史地理人文个散文「行過濛沙煙个山路」得著國立臺灣文學館客語散文金典獎，更係鼓勵我繼續寫下去个盡大動力。

我想，學問無比止，學習乜無停止，就食到老學到老吧。

筆者接著問到，您寫散文、小說也寫詩，2012年出版《阿姆！阿姆！》客語童詩，可否談談您的兒童詩觀：

詩係一種感受个表達，尤其兒童詩更應該單純、直覺，毋好將成人个道德觀摎教條放在裡肚，就算有欲加之个教育意涵，也只需隱含於童趣之中。在內容上，客語童詩或華語童詩，其內涵毋會因為語言差異有所不同，只係用以表達个語言牽動不同个世界而已。一首好个客語童詩除了具備感受性與童心、童趣外，創作者必然係直接以客語思考、客語漢字書寫──我手寫我心，我手寫我口，的當个加入客家元素：像諺語、音韻等恁仰所表達个思想，正坐得精準到位。在題材上，除忒篩選好个傳統，乜應摎現代接軌，正能發展新个文學思維。

 

 

從以上專訪中，我們的知張先生不但熱心推廣客家文學活動，更是劍及履及、筆耕不輟的創作者，是有志於客語文學創作的模範。文末，我們欣賞張君的一首童詩──〈年獸過新年个由來〉，描述小年獸和人間小朋友一起過新年的故事。
〈年獸過新年个由來〉
年獸个孫仔
問過年个由來

年獸阿公就講
頭擺頭擺
有一個人打紙炮仔
嚇恩个祖公
下後逐年為著紀念
大家見面都講恭喜恭喜
恭喜大家身體康健
正走得利

圖：邱郁蓁(《阿姆！阿姆》童詩內頁。繪者為龜山鄉楓樹國小五年二班，完成於2012年3月)

備註：本圖摘自張捷明客少年文學集<九>客語童詩繪本《阿姆！阿姆》，並將刊登於《客家少年雜誌》，完整圖文可閱讀客家少年雜誌）

▲BACK