洗湯

【文／陳淑芳（現任客語老師／臺北市民生國中退休的國文老師）】

 

昨晡日2013/12/12（拜四）打早就去公園做達摩易筋功，𠊎當煞猛盡命牯停動，無一下半仔就歸身燒熝熝、還出大汗，成時汗溚溚跌，親像摎歸面洗一遍，這係天然个面油，分你好氣色。自從𠊎立志朝晨愛運動，三隻月以來身體改善當多，𠊎定著愛繼續「活動」下去。

在會做忒个時節，吾同事好朋友Call𠊎共下去冷水坑行行兼洗湯，這難得个機會，顧不得10:00起有一場「北市婦女寫作協會」个講演愛聽，先去「快活、樂活」再過講。

兩儕先在仰德大道「摩斯漢堡」食了朝，正入去「冷水坑」女湯。天時冷咻咻，人無已多，毋過接等入來个大姑小姊，也同細細仔个水窟仔尖到淰淰淰，因爭這係開放毋使錢个原因。

這溫泉池中有各形各樣个婦人家圓身，任你欣賞。大體就係上了年紀个老大阿姊、阿桑，葫蘆型个、阿不多（不倒翁）型个，正三角型，還有粒粒碣碣不規則型个有較多，想愛尋一個標準模特兒身裝个，根本尋無著，你用膝頭愐就知，親像吾妹仔這兜後生細妹仔，無可能會來這位所拋頭露面啊！毋過，對一個個打摺又變型个圓身頂項，掛等一對對千奇百樣个奶菇，憔憔皺皺个頸莖頂高个無春風當皺痕个面頰卵看起來，做盡乜光華華仔看起來聖潔又真靚，這歸身个皺痕就係歲月在該圓身留下來个痕跡，何必花大錢去「脈衝光」、「雷射除斑」、「拉皮」、「矽膠填充」整形美容呢？

成時，在這短短个十五分到二十分鐘之間，𠊎恬恬聽佢兜一二儕大聲胲分享厥生活个經驗，試著這兜大姊、阿桑做下係人間瑰寶，佢兜將一生人奉獻分屋下大細，到這滿行路強強就會行無正个時節，日日坐免費公車上山來洗身，自家照顧自家，毋使煩勞大細，分𠊎非常佩服，等𠊎老咧，乜愛恁樣「自立自強」正好。

▲BACK