二槽仔文學

羅肇錦

 

客家文學介定位還吂清楚，故所客家文學介創作研究也無幾多，當然寫出來介文章也當有限，有介寫來非常硬程有實力，有介軟札札仔無麼介營養，就親像年冬下割禾曬穀，燥了愛扛風車出來攪穀共樣，「肨穀」分風吹到風車尾縫縫飛，「精穀」較重就跌落第一槽，半精肨介毋重毋輕，自然就跌落第二槽按到「二槽仔」。肨穀無錄用，就同精米打出來介「礱糠」共下放，起屋做泥磚該下，拿來攪泥做泥磚，精穀就糶到「精米所」去礱，第一擺礱出來的就是糙米，再礱忒糙米頂項該層皮，就係恩人食介白米，擂忒該層皮就係大家拿來餵豬仔介糠仔。「二槽仔」就拿來攪臭餿飯過渫熟介番薯，拿來餵雞鴨，雞鴨食二槽仔並無養分，目的係利用二槽子粗鬆介特質，攪拌到食物底肚，正無會粘粘，無賭好會哽死雞鴨。
故所，講客家文學「二槽仔」，係貶低介稱呼，但係，崖佇這位講客家文學係二槽仔，毋係挑事講分人膦火大，崖有崖不得不該道理，首先，以創作來講，
到目前為止，用客家話寫作介人無幾多畲？作品也捻手指頭就算得出有幾多篇，難怪有人講「做研究介比創作介人較多」，仰會有辦法拿出有實力介作品分讀者看，仰會寫得出有份量介論文。人講「量多正會質變」，質好正會餳人多看多寫。假使大家寫介東西全係二槽仔文學，該客家文學就會一直無質又無量，實在分人擔心。

續下來，以文學介地位來講，真多人無讚同有「客家文學」，淨有「台灣文學」定定，問佢兜原因根據，佢兜講客家文學作品同台灣文學比，所佔介份量忒少，無資格按著客家文學。但係，台灣文學作品比起中國文學乜少當多，係無係也做毋得按著台灣文學，台灣單淨有中國文學定定。結果，佢兜跈等變面，罵你大統派，罵你毋認同台灣，罵你毋痛惜台灣客家人，真係「厥婆該朳仔」。出世到今，第一擺賭著這兜愛台灣愛客家介「野膦屎」，對文學係麼介「番薯抑芋仔」還毋知，就「核卵跈脧膨」，一日到暗淨知台灣第一，客家豁淨淨。

    其實，論客家文學講台灣第一，就係講客家永遠係二槽仔，二槽仔盡尷尬，毋硬  毋軟，毋精毋肨，毋座頭毋座尾，毋-------。毋過，這較無相關，二槽仔盡死無命、盡慘介係：「無法度傳種」，大家想看啊咧，一粒穀，半精肨，好看相，無種，愛仰般傳代。客家文學假使一直係二槽仔，該就會攏種無精穀，無辦法傳種，無辦法爆芽，無辦法綻筍，無辦法生葉，無辦法遞藤，無辦法結包、開花、打子。永久無辦法自主自創自家介客家文學，也沒辦法自立自強形成有自信介文學。

總講，客家文學目前不管創作研究，抑係所處介地位，全部係「二槽仔」現象，假使大家毋煞猛創作研究，爭取客家文學介地位，毋使幾久，等後生人客家話講不順該樣時，正想愛寫出有客家味道介文學，該就雞公打鴨麻－－無彩工，樣欸踏乜生毋出精卵，無才調傳種。

二槽仔文學_羅肇錦聲檔

▲BACK