蕃花

【文／羅肇錦 (國立中央大學客家語文暨社會科學學系榮譽教授)】

 

天穿日堵堵過忒年，入去山項看新種个楓樹爆葉吂？無想著續看著禾埕邊該頭佛果樹蕃花打个佛果跌到歸樹下，分蟻公食到半尷不尬，看起來還當鍚人食，毋過箝楸楸个蟻公愛樣仔落喙？這可能係蕃花打子季節毋合，故所打無成來分人食。
崖從細到大，盡輒看著蕃花个樹種果子有：八月个桐花（正常係四五月開花）過年个菝仔（冬菝除外）、十月个菜瓜、十二月个牛眼-----等等。蕃花个樹草，差毋多就會開落落个花，但係打毋成子，故所正當時節開花打子以外，時節過忒又更過開花就安到「蕃花」。毋過，面前講「十月个菜瓜」、「十二月个牛眼」，同「十二月个芥菜（傷心）」、「六月个牛眼（白核）」全毋共樣，「十二月个芥菜過時了，菜心變胖變虛客話講這菜上心」、「六月个牛眼吂熟，核看起來還白白」，這是講過時个芥菜同吂熟个牛眼，同「蕃花」毋半息關係。   
一頭樹仔從「點仁」、暴芽、綻筍、生葉、遞藤、抽莖、開花、結苞、落蒂、打子，經過非常複雜个變化，正有辦法修成正果、正有好个結果。這恁長个成長過程，萬一有某一個過程無完整（像水分無罅、莖藤受傷、花葉缺日溫等）就會綻毋出筍、生毋出葉，遞毋成藤，抽毋出大莖、開毋像花、結毋硬苞就結毋成子。蕃花可能係這兜過程肚項，因為樹仔缺水缺養分，就會結毋成苞打毋成子。

蕃花_羅肇錦教授聲檔

▲BACK