鬆榮

【文／羅肇錦 (國立中央大學客家語文暨社會科學學系榮譽教授)】

 

過年轉鄉安到轉年，轉年十日半月，親戚朋友見面問東問西，「恁久鬆無？」「恁久手頭還異弦（音it hen很緊）」，「你今年賺恁多錢這擺就鬆榮誒哪」-----。

在這兜問話對話肚項，大概可以了解鬆榮係麼个意思。

「鬆」个相反係「弦（henˇ）」，故所「較鬆」「當鬆」表示物質或精神的生活條件都充足無壓力就是客家話的「鬆」。故所「手頭較鬆」係講金錢物質充足無缺，「事頭異弦」係講時間當逼空間無罅。「榮」係樹仔个花，開到當多當盛安到「榮榮」，古字典講「木曰榮，草曰華」表示草仔開个花安到華，樹仔開个花安到榮，故所「月光華華」係講月光當光，像草花開到當盛當靚。

生活條件充足無壓力安到「日仔鬆爽」「生活鬆榮」，故所地位高名聲好也安到「榮華富貴」「生活鬆榮」。可見「鬆榮」係用空間當闊時間當足表示「鬆」、地位當高名聲當好表示「榮」，一畲人个生活做得「又鬆又榮」該就當鬆榮。

目前客家界漢字用法，無係寫「從容」就寫「鬆容」，崖認為有參詳个空間，因為「從容」雖然有空間當闊時間當足个意思，但係無地位當高名聲當好个意思，相同个道理，「鬆容」也係有空間當闊時間當足个意思，連無到有錢有位个「鬆榮」，請大家多多指教。

鬆榮_羅肇錦教授聲檔

▲BACK