發肉雄

【文／羅肇錦 (國立中央大學客家語文暨社會科學學系榮譽教授)】

 

「發肉雄」第一隻「發」字愛講bod，做毋得讀fad，因為客家話單淨有bod肉雄定定，無人講fad肉雄。這同客話「圓墳」共樣，僅可講「圓pun」做毋得講「圓fun」。做麼个愛恁樣分別？這就關涉著早期音同後期音个問題，b- p- 係早期音，故所較早个詞彙「發肉雄」「圓墳」就愛讀 b- p-， f-係較後期發展出來个音，故所「發明、發福」「墳場、墳土」就愛讀f- ，就因為「發肉雄」係早期保留下來个講法，故所一下人較後生个就毋知「發肉雄」係麼个意思。
另外，也因為「發肉雄」係早期客家輒用个詞彙，現下人當多就毋知「發肉雄」係講麼个，也毋知愛樣仔轉換到國語。僅可用相對个意思來轉話，勉強講意思係：後生條仔精力過剩，愛用較強烈个動作來發洩厥體力，這種無意義个動作，就按到發肉雄。像自家緊飆緊跳，亂喊亂叫，就係發肉雄个現象。相同个道理，一个食忒飽無事做，專門撩手弄腳，亂唱亂喊个人，就會分人講「發肉雄」
。但係請大家放心「發肉雄」毋係病，等後生期精力忒足个時期過忒，自然就毋會「發肉雄」了。

 

 

發肉雄_羅肇錦教授聲檔

▲BACK