老公个夫娘

【文／羅肇錦 (國立中央大學客家語文暨社會科學學系榮譽教授)】

 

臺灣客話稱呼先生个夫娘按到先生娘，稱呼老公个夫娘按到姐仔（音tsia ve），稱呼丈夫个夫娘按到老婆，還有稱呼討來个學老夫娘按到學老麻，稱呼討來个原住民夫娘按到假黎婆、也按到番麻，大陸客家地區稱呼討來个外國夫娘按到番婆。
    這多稱呼完全用夫娘毋共樣个身分角色來按名。稱呼「先生娘」係因為日據時代日本人个習慣，對較有地位个人个夫娘就按到先生娘，就像官話肚對做官人个夫娘按到夫人共樣，無過台灣客家界對「先生娘」个稱呼，單淨用到律師、會計師、醫師、教書先生个夫娘會講「先生娘」定定，其它人个夫娘就做毋得按到先生娘。姐仔（音tsia ve）个稱呼主要系南部六堆客正有个講法，北部人聽起來會疑狐一下正知麼个意思。其他「學老麻」个意思除忒本來夫娘个意思還有婚姻之外个細妹仔也按到「學老麻」，南部客講番按到假黎，故所夫娘按到「假黎婆」，共樣道理外族討來个夫娘自然就按到「番麻」，無就按到「番婆」。
    較無共樣个係稱呼丈夫个夫娘按到老婆這个用法，這係近幾十年國語用法个影響所形成个，無過東南亞各地客家人用盡順个稱呼係「崖老婆」「你老婆」「佢老婆」，故所目前中國大陸或世界各地客人喊自己个夫娘案到「老婆」个人佔盡多數。該在臺灣還吂恁進步，台灣客人喊自己个夫娘案本本到「夫娘」个人佔盡多數，不管北四縣、海陸、大埔、饒平、詔安都共樣，喊老公个夫娘按到「夫娘」。

 

 

老公个夫娘_羅肇錦教授聲檔

▲BACK