讓身

【文／羅肇錦 (國立中央大學客家語文暨社會科學學系榮譽教授)】

 

「讓身」這隻詞，大家看著定著撒無頭蹋，算來「讓身」个「讓」，係讓人个意思，抑係代音字。講老實話，崖在這還係無敢決定，因爭「讓身」就淨客家人有恁仔用定定，別種話肚項，崖還吂識看著。故所，要解釋起來有異多个困難，但係，這係一個當難得又當有特色个客家話，不管樣仔，崖就愛在這，用盡所有个本等，來解釋分大家參考。
頭先來講「讓身」个一般用法。主要係講睡目架下，著等做事也係出門个衫褲，無換過睡目个衫褲，也無脫外衫長褲，就走去蓋被睡目，就按到「讓身著，讓身睡」。中國古代《詩經》肚有講：「身則厲，淺則揭」意思係講，過河灞架下，係講水當深，就「讓身」過河，毋使脫衫褲、毋使攝褲腳。也就係講「身則厲」就係「讓身過河」个意思，反正恁深个水，有脫衫褲、無脫衫褲就共樣浸到歸身濕濕。故所「讓身」有「將就」个意思。
再從「將就」个立場來想，「讓身」个詞彙本義，可能係講，在無辦法處理个情況下，膏不理漿，就讓出身體，看破生死，隨佢變化。故所「讓身著，讓身睡」就係當想睡架下，無精神換衫褲，無就臨時及急，無衫褲好換，將就著等外衫外褲睡目。恁仔講來，「讓身」就變到「讓開若个身分裝扮，用當時个服裝來代表你睡目个身分」故所按到「讓身著，讓身睡」。這就係「讓身」个本義。

 

 

讓身_羅肇錦教授聲檔 (音檔內容請使用IE瀏覽器執行)

▲BACK