教化

【文／羅肇錦 (國立中央大學客家語文暨社會科學學系榮譽教授)】

 

「客家人講著「乞丐」就會想著客話个「乞食仔」，假使有人講「乞丐」客話按到教化，你定著會罵佢亂鬥亂講顛人講顛話，該係講官話个人講个，客話恁清楚就係乞食，哪有按到教化。
    其實，認真請教前輩，抑係煞猛掀書，你就會了解，客話從古老到今，當多地方就稱呼「乞食仔」按到「gau化」，背尾因為北方官話用「教化」或者「叫化」，來表示，續歸个亂忒誒，另外恁堵好官話有兜人講「教（gau）化」同「告化」共音，故所「告化」變成「教化」，還較堵好个係國語講「教（jiau）化」同「叫化」共音，故所「教化」又變成「叫化」，結果有人解釋「叫化」係講跈路緊喊緊化緣按到叫化，「教化」係乞食可憐做得反面教育變化社會風氣。這兜解釋全部係自家鬥个。
    實際个講法應當係，本來南方人稱呼討食个人按到「gau化」（如連陽八排瑤語乞丐叫告化）（李來章＜連陽八排風土誌＞），客家話同瑤語有一定个關係，故所客話稱呼乞食仔按到「教化」，係當早以前就有个傳統，因為瑤族、畬族、客族早期無自家个文字，北方漢人做官派到南方，就用官話音「教（gau）化」「告（gau）化」來代用。
    故所，今餔日客話乞食仔有人講「教化仔」就係恁仔保留下來个，厥个意涵同「教化」無半息關係，無論「教化」「叫化」「告化」全部都係借音字，厥个本音就一隻「教（gau）化」定定，寫「叫化」「告化」又乜愛讀「教（gau）化」。

 

教化_羅肇錦教授聲檔 (音檔內容請使用IE瀏覽器執行)

▲BACK