造定派

【文／羅肇錦 (國立中央大學客家語文暨社會科學學系榮譽教授)】

 

 漢語个語詞當生趣，當多你想毋到个變化，比將一隻「派」字，早期講水流分當多叉掗，按到派。背尾事情也係人脈無共樣，就按到「□派」，像台灣選舉到誒就有「統派」「獨派」，也係「中間派」。再過進一步，講某一種風氣，跈某一種流行，就按到「土派」「洋派」「新潮派」「傳統派」。還較厲害个有「周末派」「甜點派」「功夫派」「挶戆派」「虎膦派」----，但係崖在這位愛講个係「造定派」。
「造定派」照字面看來，造定、坐定、做定，就係生米煮成爛飯，歸个局勢變成恁樣，無辦法改變，將就等佢去，莫想恁多。這就像古人講「深則厲，淺則揭」，意思係講過河壩價下，水淺就捲褲腳過河正毋會浸濕，水當深定著會浸到，將就著等衫褲過河，反正就會歸身濕。這種情況客家話就按到「造定派」。考試到了，無時間準備，名仔又報落去了，造定派準練習乜愛去考看啊列。故所客話當輒講「頭都洗落去了，今該造定派------」。
像以前看傳仔後期看做戲，戲齣「喬太守亂點鴛鴦譜」，新娘公討無著夫娘，細妹仔嫁無著老公，造定派先結婚正講。同一下个人，男女交往生米煮成爛飯，有細人仔了，無結婚做毋得，造定派，先結婚，下二擺个事情，慢慢仔正來楚理。這係當冤枉个造定派，最好莫恁仰正好。

 

 

__羅肇錦教授聲檔（音檔內容請使用ＩＥ瀏覽器執行）

▲BACK