石剪網

【文／羅肇錦∕中央大學客家語文暨社會科學學系榮譽教授】

 

客家話个改變，一般人認為該係少部分受著強勢語言影響所產生个變化定定，定著毋會想著，日常生活所用个詞彙，差毋多就係從別種語言借過來个，顛到自家本來个用詞豁淨淨，還無知愁。

就像大家比輸贏个「靚劵」來講，一下台灣个客話差毋多就用國語个講法「剪刀、石頭、布」，旦係涯歇在苗栗个人，從細就用「石、剪、網，網、剪、石」來「靚劵」。到一下正幾十年定定，台灣个客家話差毋多就無人講「石、剪、網，網、剪、石」，大家一「靚劵」就講「剪刀、石頭、布」，無麼該人知愛用「石、剪、網，網、剪、石」正係本來个客家話。

假使用喙唸來鑑定哪種講法較搭句，該答案當清楚，客話个「靚劵」用「剪刀、石頭、布」，係又長又拖棚全毋節奏，靚起拳來就無比輸贏、定生死個氣氛。反倒轉來，用傳統个客話「石、剪、網，網、剪、石」來「靚劵」，一隻字一隻字短遽又有力，分人个感覺就當有拚生死賭贏輸个樣子。

涯想，任何詞彙个產生就有厥个背景，國語用「剪刀、石頭、布」，係佢有最尾个「布」係當高向下降个調子，正有辦法表現當有力个比輸贏定生死个感覺。 客話四縣用「石、剪、網，網、剪、石」，係佢有最尾个「網」係當高向下降个調子，正有辦法表現當有力个比輸贏定生死个感覺，假使像目前當多人用國語「剪刀、石頭、布」來講四縣話，最尾个「布」字，就變到又高又平像打屁「ㄅㄨ」「55調」恁樣个聲，全無辦法表現當有力个比輸贏定生死个感覺。係講全部客家話就變到恁樣，該就無使按煞猛推廣客家話了。

石剪網—羅肇錦教授 聲檔

▲BACK