用歡喜个心 做歡喜个事

【文圖∕李幸妃∕中央大學客家語文暨社會科學學系在職專班碩二生】

 

人生个路行有一半啊，翻轉頭去䀴，我會用算係一個真有福氣个人。想遐時，阿怙拁我安名个用意，無定著係希望我一世人攏會用無擘無心過日，不管時攏有好運、有福氣，係一個幸福个妹子，所以，我个名正有一字｢幸｣。斟酌想想个，自細到今雖然無趁大錢、無買田買屋、嘛無駛進口車，毋過，日子總過到平安順序猶算毋會䆀。

    無風無搖个日子嗄在幾下年前，因為選舉个關係，頭家換人做，頭路即愛換人食，我只好包袱擐个，轉屋下做｢阿嬭｣。遐睏子，歸日閒閒無事做，實在真毋會慣勢，老實講嘛毋知愛做麼个較好。心肝內全然急，我即像鑊內底个蟻子共款，烏白傱。一下子去廟拜拜，跌筊問神明，一下子去排八字算命問前途，舞到心神無定若起𤞚个樣。

    我依䀴到毋盼敨大氣拁我講：｢戇阿女啊！人講一枝草一點露，現時係時機無好，擱等望。若肯做，天公會得你一條路行！｣係啊，阿依个事確實安定我个心，天公爺拁我个一扇門關莫，一定會開一扇窗門還我。我肯等，嘛肯做，我擱較毋認輸！

    一站時間過後，後生提一張客語初級認證个報名表得我，愛我去考䀴望。我感覺真怪奇，客事係我自係講到大个事，仰子愛擱認證，通過認證會用做麼个？唉！橫直啊無猶个事情好做，即來考䀴望好啊，䀴望客委會到底在變麼个目藝！

講嘛心適，我初級考了即連續考著中高級，接落來熟事一兜為客語傳承打拼个人，我即按行對一條幸福个路去，做一個本土語言教學先生，教我熟事个事，做我歡喜个事。雖然係教我熟事个語言，毋過，毋係科班出業个我，面對學生有影係一種考驗。我愛著面教學著面尋資料，感覺能力毋罅、愛擱學个物件傷多啊，鬥底愛仰子正好咧？這個時務，有人對我擛手，比一個方向，喊我去遐尋答案！遐即係中央大學个客家學院。

    討50歲个人擱來做學生，係一件幸福个事情。一輪轉300公里个路途，係我挑戰自家个開始。逐禮拜討駛車去中央大學，攏會問自家一遍，敢有法度堅持到頭尾？我敢有法度？正開學个時，確實有影有一兜仔驚驚！

    毋過，研究所个教授、同學，攏係各行各業个人才，生活經驗真多，有个食過个鹽比我食過个米較多；較少年个同學較有滿位遊尞，總有真多心適事和大家分享。上課个時，有問題、堵著困難，大家會互相鼓勵，鬥相共想辦法解決。按个感情真額愛寶惜，會用在這和大家作垺學習係得我感覺幸福个事情。

    幸福真簡單，用歡喜个心去做歡喜个事情。我行在一條通對幸福个路上，這條路有興趣相共个先生和同學，有支持我行落去个學生和屋下人。我想，做一个客人个阿女教客事、做學生研究客事，係我頭幸福个事情。（2016/2/14）
(本文以詔安腔寫成，上圖前排右三即是作者，帶領學生參與全國語文競賽合影。) 

用歡喜个心做歡喜个事—李幸妃聲檔

▲BACK