凡間

【文／羅肇錦∕中央大學客家語文暨社會科學學系榮譽教授】

 

凡間有一種傳說：
相愛个人有兜仔神經毋正常
定婚个人總會無格無煞
結婚个人有兜仔閒閒無事做
離婚个人總會跌忒東西
凡間有一个事實：
相愛輒常做毋到相守
相約輒常無辦法準期
凡間有一个捉弄：
相守个影仔變成心中个惡夢
思念个魂影卻是心中个最痛
凡間，凡間，何必騙崖
凡間，凡間，毋使害崖
害崖長長个惡夢
騙崖心中个最痛
從今以後
背等千山萬水
望想綿綿無期
崖嘆凡間，也怨傳說
崖求天地，又惱捉弄
崖單淨愛-----
不凋不蝕个金石
不遁不逃个天地
羅肇錦教授聲檔－ 凡間

▲BACK