火燄蟲看花火

【文∕張捷明∕國立中央大學客家語文暨社會科學學系在職專班碩一生】

 

一隻細細隻个火燄蟲，擐等一隻靚靚个細燈籠，跈等火燄蟲阿公去海脣看慶祝花火。

聲傳十里遠，光照半天雲，一陣又一陣个讚嘆摎爆炸聲，跈海浪同進退；一下又一下个七色光，照到海水、石頭同人潮，清清楚楚。

細火燄蟲看到嘴擘大大，自出世還毋識看過恁靚个光，拿起自家个燈籠，嗄看毋著半點火。

一暗晡个鬧熱，總算煞棚，看鬧熱个人漸漸退，細火燄蟲擐等該隻又媸又細个燈籠，跈等阿公愛轉屋。

細火燄蟲緊飛緊道嘆：「無看過花火，毋知自家个燈籠媸，看過花火，正知麼个安到大放光明。」

火燄蟲阿公就教佢：「乖孫仔毋使怨嘆，細罔細，毋過毋會濫、毋會媸，雖然𠊎个光只有三寸遠，只愛肯行，共樣做得照過千里路頭；雖然只有細細一盞火，有心點著，就係烏暗中个一個希望，恬恬靜靜个火燄蟲，毋會輸一天頂个花火。」

細火燄蟲聽著阿公恁樣講，斡轉頭看看自家个細燈籠，確實無差，暗夜中同花火共樣恁靚，就本本歡歡喜喜信心十足，擐等靚靚个細燈籠，跈火燄蟲阿公飛等轉矣。（本文以四縣腔寫成）

張捷明 聲檔—火燄蟲看花火

▲BACK