揭磚仔

【文／羅肇錦∕中央大學客家語文暨社會科學學系榮譽教授】

 

「揭磚仔」毋係客家人過年賭博个一个固定專詞，係苗栗地區个人，挑事講打棋子賭輸贏就安到「揭磚仔」。一般人又講「打符仔」。

「揭磚仔」係講棋子不管圓仔抑係長方个，掀棋子之前，定著愛一垤一垤疊起來，就像做屋疊磚仔共樣，故所打棋子个搞法安到「揭磚仔」。「打符仔」係講搞三三二就符，符个人就係贏家，比將講「車馬包帥仕相卒卒」、「將士象卒卒卒相相」你等其中个一只，恁堵好分掀著抑係別人打出來分你符著，你就符了，你就贏了，當然人家等炮仔你硬硬打炮仔分人著，就安到「放炮」。

古時代做官个人，拿到官府个派令係一个玉石無就一个硬樹杙，刻等官府个符號，去到當地愛拿出來同當地个符號鬥起來，表示真實無差，正做得正式上任。一般老百姓打契約也係愛刻符號，各拿一半，當做憑據。就像今晡日个騎縫章，分兩分文件，各有半只符號，做得防人做假。後代所有用來做證據个符節，全部安到「符」。搞棋子鬥著你等个子頭，就符了，故所安到打符仔。

另外，「揭磚仔」个「揭」字，做麼个毋用「結」字。吾个看法認為揭磚仔係疊高起來大家看得著，正毋會計較驚人偷步做空缺，故所疊高起來大家看現現，變鬼毋得。古人講「昭然若揭」就係擎到高高當清楚大家就看得到个意思，賭輸贏還較愛公平公開，正無會拗數，這就係崖認為用「揭」字，比用「結」字叫好个道理。（本文以四縣腔寫成）


羅肇錦教授 聲檔—揭磚仔

▲BACK