〈國家語言發展法草案〉公聽會有感

【文∕張美煜∕師大國文系退休教授，現任客家筆會理事】

 

3月26日朝晨打早出門，去竹北交通大學个客家學院，參加文化部主辦、台中教育大學承辦个〈國家語言發展法草案〉公聽會，聽講這係加出來个一場，因為前幾場（3/4台北場、3/10離島場、3/18南部場）客家个聲音當少个關係，客委會要求主辦單位加辦，正臨時決定在3月25中部該場後背為客家加辦這場。

公聽會十點開始，涯摎基隆謝杰雄先生、台北左春香先生約好坐共枋車去，本來涯兜按算坐8:46該枋高鐵，毋過參加過台北場个謝先生講愛提早一枋去，早啊登記發言，忒慢去會無機會輪著（該場學老人發言43人，客人正3儕）。

涯兜三儕坐主辦單位个接駁車去到現場，比預定報到時間9:30較早，報到忒登記發言，無想著「莫道君行早，更有早行人」，還有人比涯兜還較早，涯係13號，驚怕報名愛參加个徐貴榮先生慢到會輪毋著，涯順續代佢登記發言號碼。

恁多客家學者專家無機會發言
公聽會主持人涯毋識，總知係學老人，怕係因為係七場公聽會底肚唯一个客家場，為到尊重客家人，佢大體講華語，斯講幾句學老話定定；頭前个法案背景說明摎法案條文，派一個後生客家妹用四縣腔讀，厥客語勉勉仔，客委會副主委楊長鎮有上台講幾句話；開放發言在十點半左右起勢。

涯話著頭一個上台个會係「近水樓台」个新竹客家鄉親，無胚著頭三個發言个全係聽障手語者，續等三儕係學老語發言个，到第七儕正係第一個客家人，係桃園市議員張肇良。續下來5儕有手語摎學老語，搭搭到第13號正輪到涯發言。到12點公聽會結束，總共30人次發言，其中手語有6儕(5儕?)、學老人13儕(單淨1儕用華語發言，因為佢係師大國際與僑教學院摎華語系个教授)、客家人正11儕(2儕用華語發言)定定；這場名講係為客家加辦个一場，客人擔名，其實得著个正佔三股一(三分之一)定定，還係非常弱勢，並無佔著「主場優勢」啊！

現場有當多涯熟事个一流客家學者專家（張維安、何石松、李源發…)，都無機會發言，實在打爽、實在冤枉！新北市客家事務局賴金河局長、桃園市客家事務局蔣絜安局長乜無機會講話，主辦單位（台中教育大學，聽講佢兜係標著案仔个單位），毋單淨無請「地主—客家文化學院个院長張維安博士」做公聽會个主持人，甚至連請佢上台講兩句鼓勵个話都無，可見得佢兜並無真心看重客家，乜無盡用心來辦這場公聽會，「打屁安狗心」敢怕係！係無，仰會客人連一半个發言機會都無呢？

客家人毋罅硬頸
新北市賴局長會後黏時有去摎主辦單位反映，會發生這種分某隻團體集體期早登記發言个現象，係非常毋著个，違反程序正義个…，毋過，客人自家過於客氣（細義），毋會抗議要求延長發言時間，毋會摎主事者翻桌仔，係毋係因為忒懦弱，毋罅硬頸，正會緊分人（強勢族群）欺負？其他族群个人係堵着這種情形，絕對無恁該就放佢煞，一定會鬧到大大棚大大棚…。

公聽會項，客家人个發言內容大體係針對法案提出溫和實質个建議，像涯自家就提出兩點，對第二條甲案講个「自然語言」，一定係在台灣存在使用超過200年以上个語言正算；第四條講个「大陸地區人民及香港…」用詞不妥，忒囉嗦，愛改；尤其做毋得摎新住民个語言放入國家語言、加入母語教學，會對本土語言還較不利…。

學老人个發言，罕得講對法案條文个意見，佢兜總係強調「台灣人講个就係台語」、「台語就係台語、毋係麼个學老話、閩南語」，認為學老人正係台灣人，學老話就係台語，看（聽）得出有相當个意識形態摎文化霸權个心態，這種論點，涯相信大部分个客人摎原住民係無法度接受个。

分兩個學老媽媽嚇著
毋過，有兩個後生个學老「專職媽媽」發言，分涯當「shock」像分人當胸舂著樣係：佢兜講自家仰般堅持在屋下教細孲仔講母語个經驗，其中一個本旦係音樂先生个，為到專心渡細人、自家教細人講母語，斯摎頭路辭忒；佢兩儕都抗議政府仰無開全母語（學老話）个幼稚園好分佢兜个細人仔讀哩。這種傳承母語个「硬頸精神」，客家人罕得有！

母語想愛靠學校一禮拜一節四十分鐘个課來傳承，係戽水上天个難事。定著愛家庭有教有講，細人仔正學得會學得正，客人在這方面輸學老人輸痶痶，摎人擎腳毋得！涯個人自阿扁總統時代參加母語教學評鑑以來（馬英九做總統以後就停忒咧），自從毋識堵着半個像該兩個學老媽媽恁樣个客家媽媽，半隻都無！恩俚客人係有加兜像該兩個學老媽媽恁樣對母語个堅持，客話就有機會反生咧，阿門！

自家愛檢討做毋得全怪別人
涯試著客話會嚴重流失，雖然有已多外在不利个因素，比論講人數財經个社會弱勢、政治權力个弱勢…等方面，但係內在本身个因素乜愛檢討，做毋得全怪別人，因為當多鄉親本身就毋重視母語，認為學客語無用，自家毋講，乜毋教子女大細講，甚至反對細人仔在學校選修客語，喊佢兜選學老話，講另擺摎學老人較好溝通。

像新竹縣，客家人口占會八成，小學母語課開客語个正25%，這種情形係發生在學老語課，家長無來摎佢詈、摎佢拚正奇怪！客籍家長對細仔人有學母語个事情無哀無哉，新竹縣長就毋使認真推客語教學咧；連公聽會在厥地盤辦，佢兜都無半儕踏到來小可關心一下，斯知佢兜个態度係仰般形咧；客家重鎮—新竹將將就會聽毋著客語咧，其他个「客家重點發展區」也怕共樣，客語仰會毋死呢？

客人係本本毋關心自家个母語發展，毋參加公聽會提出意見，阻擋不利客語个法條，將來有一日，係法律定到對另外一種強勢語言特別有利，變成官方語言，該大家就會有目汁噭到毋目汁，無面皮去見阿公婆哪！（本文以海陸腔寫成）

本文作者（右）張美煜教授與新北市客家事務局賴金河局長於會後合影。

▲BACK