蠟蟬
【文.圖/富岡 邱鴻春/中央大學機械工程學系碩士】
發音人:邱鴻春(海陸腔)
摎平常共樣,逐禮拜二過拜六个十一點空仔出門,載阿爸來楊梅洗腰仔,已經有三年,洗一輪愛四點鐘,其他時間大部分就在旁脣陪佢,毋過硬硬愛等四點鐘,時間也無盡好過。
好得醫院脣頭,有楊梅區公所早先開發个月眉健康步道,行一圈差多點半鐘个時間,有經過樹園摎河壩脣,風景毋會幾濫,可惜這下較少人來行,這三年來,崖算恁滿輒會來行,這日共樣摎護理師交代一下,麻煩佢摎阿爸小注意下,崖就出發咧。
見擺來行,就小可看下風景摎河壩肚个魚仔,主要係練練腳力,先生乜長透仔講,行路係最好个運動。所以今晡日摎平常時共樣,乜無特別來注意,樹園肚裡背有麼个東西,行有一下个時間,遠遠看著,一欉樹頂有一垤像燥樹葉个東西,毋過試著花色有點靚,就停下腳步行兼來看,一開始堵好企在佢个背囊這片看,看著就像係一垤燥樹葉仔定,本來想莫愛插佢,準備愛來行走咧,吂知佢續打側來徙位,正知佢正經係一隻生物,像係一隻蝶仔企在該,翼無打開來个樣仔,伏兼看較真兜仔,佢个翼實在有當靚,就像著等禮服共樣,頭那長長像樹葉炳,目珠生到頭那這下截來,還目金金緊看崖,遽遽拿手機仔出來翕相,無想著佢乜盡配合,還會略略仔停動徙位分崖翕。(如下圖)
本來話著係蝶仔,就用蝶仔做題目,在面書个”台灣俳句客家定型詩園”寫575十七隻字个俳句分享,得到俳句詩園盡多好朋友个熱烈回應討論,全講吂識看著,生著恁特別个蝶仔,包尾好得有一個俳友,盡熱心查著講這係蠟蟬,全名安到渡邊氏東方蠟蟬,因為佢全身有白色蠟粉,所以又安到白蠟蟲,無想著這擺無意中翕著這張相片,做得有恁大个反應回饋,感覺盡有意思,像人係,大家全上了一課又進步咧。
這相片拿分八十零歲个阿爸阿姆看,佢乜講無看過,也傳分幾個朋友看,全部也講無看過,想起來實在盡難得,記錄下來同大家來分享。
毋過想想仔,既然這蟬仔有佢自家个名仔,崖還上維基百科頂查看一下仔,知佢係分佈在北部1000公尺以下个山區,做麼个問著無人看過,這係毋係表示,摎𫣆俚人有關係,係毋係有可能過量破壞佢个生存環境,正會數量減少無人看過,這正係𫣆俚愛來好好思考个問題!