客家人係台灣人無?
【文/范文芳/國立清華大學中國語文學系退休教授】
發音人:范文芳(海陸腔)
ㄧ、無共樣个觀點
1. 人種个觀點,從膚色个觀點,有白人、烏人、黃種人,從洲際个觀點,有亞洲人、歐洲人、非洲人、美洲人。
2. 出生地个觀點,亻厓出生在台灣新竹竹東,我餔娘出生在中國上海,我个子女出生在新竹市。
3. 現代民主國家,合法个居民,向自家个政府納稅,也享有政府公共政策个保護,目前亻厓个政府係中華民國,但係因為中國个阻擋,加上當初蔣介石毋願用台灣个名義,留在聯合國,故所中華民國變成國際上無承認个國家,目前國際上同中華民國保持國際法上正式外交關係个國家,毋到20國。
4. 亻厓个老祖先,有中國古時春秋時代个晉國六卿之一范氏,戰國時代范蠡,宋朝个范仲淹,滿清中期,從廣東陸豐移民來台个來台祖,係從宋朝算起个第14世。現在座落在竹東大窩个范家祖墳,稱來台祖俊惠公為14世,亻厓在祖譜上係20世,范姓相傳个堂號係高平,范、高平都係中國北方地名。
5.根據范姓个族譜記載,亻厓个2000年前老祖先係漢人,300年前个來台祖係廣東客家人,亻厓係台灣人。
6. 美國前總統歐巴馬有非洲血統,膚色偏烏,大家稱佢為美國人,也毋會指責佢忘本背祖。
二 、裡擺東京奧運引起个風波
1. 裡擺台灣个奧運代表隊,在開幕式入場時,喊名為中華台北,日本个現場放送解釋為台灣得是,翻譯成華語,就是台灣,全場歡呼,唯獨中國無法接受。
2. 台灣个團隊,在公開、公平个比賽中,表現出个風度摎成績,大家都阿老,顛倒中國雖然得著獎牌最多,毋過其運動員、觀眾所表現个風度、修養,實在不佳。
3. 裡兩年來,全世界受著武漢病毒个侵害,也使得台灣受著全世界非共產國家个阿老,台灣个名號,在全世界,尤其係民主國家之間,緊來緊受著肯定。
三、台灣兩字愛樣般發音
1. 回顧到500年前,羅馬拼音稱TAIWAN,其實係用福建話發音,假使用華語或者用客家話發音,當時就會拼寫為THAIWAN或者THOIVAN。
2. 舊時个羅馬拼音稱新竹為HSINCHU高雄為KAUSHUNG,假使用現行个中國漢語拼音,新竹係 XINZHU高雄係GAUXUNG。
3. 台灣,用中國式漢語拼音係TAIWAN,用台福語發音係DAIWAN用台客語發音係TOIVAN。
四、灣、彎兩字,華語同音,台語有分
1. 彎、灣兩字,台華語同音wan陰平調,台灣、轉彎同音。
2. 台福語、台客語彎、灣兩字音義有別,轉彎係陰平調,台灣係陽平調。
3. 竹苗地區个地名三灣、內灣,灣字都音van陽平調。
4. 台灣一語,台華語音Tai24Wan55,台福語音Dai33Wan24,竹客音Toi55Van55,苗客音Toi11Van11。