客家山林文化个動詞
【文、圖/邱一帆/國立中央大學客家語文暨社會科學學系客家研究博士班】
發音人:邱一帆(四縣腔)
1.鋸
選一頭
過一頭个大樹
拉去拉轉
撐持一間屋个棟樑
長鋸鋸大樹
板鋸鋸紮樹
短鋸鋸樹桍
鋸去鋸轉
一屋家生活个倚恃
掛在文化館展示个鋸仔
無人知佢
鋸過幾多頭大樹
撐持過幾多家人个生活
佢也老到
無法度行轉頭擺
講出自家个故事
2.焗
樟樹成林
一隻一隻个地名
敢還有人記得
腦寮還在
頭擺个地圖項
一隻一隻个位跡
敢還有人知得
大灶裝滿个腦油啊
有幾多族群个悲歌
共鑊蒸出
有幾多生活个記憶
跈等腦油膏上
自家个腦筋裡背
3.吊-吊頸樹
貧窮係一條吊頸索
一頭䌈在樹梗
一頭落在頸根
幾多無法度忍耐个人
踢開矮凳頭
變成一頭一頭个吊頸樹
4.毒-魚藤精
學會用魚藤
毒魚仔个男仔人
曉得加添菜色同營養
兜上瘦瘦个食飯桌
知得用魚藤
毒魚仔个婦人家
嗄用佢來毒自家
為貧苦个家庭
省一雙碗筷