樹枝蟲
【文/黃美貞/光復國小教師】
發音人:黃美貞(四縣腔)
上忒自然課,阿民仔擐等一隻塑膠桶仔轉到教室,遠遠看毋出係麼个東西,行兼一看,原來肚項裝等一隻樹枝蟲,係𠊎盡喜歡个一種動物。
樹枝蟲無麼个特別个本等,淨會將自家變成一個細樹枝,分敵人看毋著佢兜,算來係樹枝還係蟲仔,斯愛認真看正知得。一禮拜過後,阿民仔對樹枝蟲懶哩,無愛插漦佢哩,𠊎高不將帶轉屋下,準動物伴仔,就喊佢阿青仔,一隻桶仔就係厥个天下,去外背拗朳仔樹杷分佢爬,摘朳仔葉分佢食,桶仔底下鋪一層鋸屎,毋使清桶仔,乜毋使買飼料,算來係當簡單畜个動物。
有一日,𠊎試著阿青仔日日就分人跼等,實在異衰過,就將佢放出來,放到桌面項个竹葉青,竹葉青差毋多一尺高,葉仔浸青,佢就定定仔爬上去,企到盡頂高,六隻腳企著穩穩。過一下仔,厥个身體還會上下停動,看起來像係做運動;成時仔,身體變著彎彎倒吊,六隻腳伸到長長,歸半點鐘無停無動。後來,𠊎去店頭買東西,轉到路項正想著,毋記得將阿青仔放轉去,害𠊎尋上尋下,恅著怕分蝲䗁食忒了,無想著,吾頭那探啊起來,原來在天篷頂个日光燈脣項 。
暗晡頭,𠊎會帶阿青仔去散步,順續仔摘朳仔葉,行到路燈下,該光線晟過來,佢遽遽將腳跔起來,身體同腳黏時變到直直,連兩條鬚乜合共下,像葉仔个紋路,怕係著驚个自然反應,後來,尋資料正知得,原來佢喜歡較暗个環境。拗來个朳仔樹杷愛插到裝水个笐仔,葉仔加異耐放,當仔著五六日,毋會兩下半燥忒,省使密密去拗。輒常新个葉仔一放落去,樹枝蟲就會開始用細細个嘴食嫩葉仔,從葉仔脣開始食,毋多知仔,葉仔就變到一缺缺仔,就恁仰,食飽尞尞飽食,看起來無愁無慮,還暢快哦!
樹枝蟲係當奇妙个動物,單淨一隻乜做得繁殖,雖然吂看著阿青仔生卵,毋過𠊎開始愁便了,係緊降緊多愛仰結煞正好?