來認識客籍作家
【文、圖/鍾榮富/南臺科技大學應用英語系講座教授】
發音人:鍾榮富(南四縣腔)
客人在台灣人口中,大概佔11%左右,毋過客人有「耕讀傳家」个傳統,重視子女教育,培養了不少作家。這愛介紹个係鍾肇政同李喬。渠兩儕都教過書,做過先生,退休以後全身奉獻寫作,出版過大河小說,作品分人拍做電影,影響台灣文學十分深。
鍾肇政(1925-2020),桃園龍潭人,對彰化青年師範學校畢業以後,一直無離開教書个工作。佢受个係日本教育,透過日文佢讀熟了盡多西方个文學作品,故所思想開放。可惜日本時代,統治者對台灣人百般欺負,並無分台灣人平等競爭个機會。
日本敗退以後,國民政府接收台灣,推行華語教育。鍾肇政從頭開始學華語,學用中文思考同寫作。一步一腳印,就恁仔佢開始創作,想愛將分外人統治个經驗,寫出來同讀者分享。佢个《濁流三部曲》屬於自傳體小說,利用虛實交互串聯个方式,將心中長期个苦悶化為文字,有寫實,有想像,十分成功。後來出版个《台灣人三部曲》,透過三個階段个家族歷史,記載了日本統治台灣五十一年个辛酸同苦難。鍾肇政係台灣大河小說个創始者,建構了本土為核心个寫作觀念,開拓了台灣文學个領域同視野。
李喬(1934--),本名安到李能棋,苗栗人,新竹師範學校畢業,教過小學、中學,前後共28年。從第一篇小說「賭徒的自述」(1959)開始,佢用心觀察周圍客人个生活、講話方式、人格發展,寫出底層客人个種種辛酸,反映了人性个尊嚴。1978年退休後,潛心創作《寒夜三部曲》,將先民抗日个過程,戰爭陰影下个徬徨,百姓同土地个感情,寫得入骨入肉,讓人讀起來目汁流毋停。李喬係寫作个十項全能,佢寫長短篇小說,寫散文,寫評論,寫書評,還寫宗教、思想、哲學等等相關个文章,每一項都表現傑出,十分難得。
李喬个創作在形式、內容、主題、表現方式、文體等等小說敘述中,一再實驗,充滿了變化,輒輒挑戰佢自家,佢毋容忍別人將佢框定為鄉土作家、歷史小說家、心理小說家,或者係政治小說家,因為佢个小說,無論對哪個橫側面切入,都會發現本身就是精細的藝術品,催燦、亮眼、結構緊密、節奏舒緩有致,鮮少錯亂。
鍾肇政同李喬不單只係大河小說个開路前鋒,同時也係觀察、紀錄、分析、同批判台灣人性格个紀錄者,佢等个作品刻畫了台灣在不同時代的生活面貌、思考方式、心理形成等人文層面个凝聚過程。