雙語教育个轉圜
【文/羅肇錦∕國立中央大學客家語文暨社會科學學系榮譽教授】
發音人:羅肇錦(四縣腔)
從客話歷史來看,千百年以前,祖先學講話,就係自家屋下學客話,出外莊做頭路也係讀書,同外人接洽嘎下,就學當地盡強勢語言腔个官話。這種歷史上个雙語教育,一直進行歸百千年,故所客家祖先个語言,就慢慢仔轉換到緊來緊像官話,到一下个客話,正會變到歸十隻詞伸無一隻係本來个祖宗聲,這就係客家歷史上經過个雙語教育,也係客家歷史項雙語教育个結果。
一九八八年台灣客家界發起還我母語大遊行,目的係搶救強強會斷層个客話。三十年以來,用盡所有个辦法,同政府對抗要求制定國家語言法,希望客話係國家語言,做得在學校同官話共下在學校來推行。故所客話也係國家語言,同國語、學老、原住民語平平企平平坐,恁樣客家鄉鎮就做得用客語華語來推行雙語教學,學老地區就推行閩華雙語教育,原住民地區推行原華雙語教育。可惜,八字還吂有一撇,就聽講政府又愛準備推出新个雙語教育。
新个雙語教育政策係英語同華語齊頭共進个語言學習政策。這個政策對還吂恢復元氣个客話,會係死無命个大災難。大家用腳膝頭想就知,學校用華語同英語做基本雙語教育,哪還有客語教育个時間同機會?歸隻社會全心學習外來个語言,下二擺正有辦法尋頭路賺飯食。該央時,因爭學客話對賺錢生活毋係盡重要,故所客話定著會分人攉淨淨,毋使幾久,台灣就會像新加坡樣仔,為著經濟、為著同人競爭、為著現代科技、為著同世界各地來往,大家就煞猛學英文,煞猛學華語,新加坡个客話、學老話、廣東話永久就排毋著時間來學。毋使幾久,全新加坡差毋多就無英華以外个語言。當然恁樣个國家,會變到有現代無文化,有進步个物質生活,無滿足个精神寄託。該當然,祖籍客人个李光耀、李顯龍也無講客家話,毋會講客話,加一駁仔,就無客人了。
台灣也共樣,為著經濟、競爭、生存、行入現代化了後,就愛推行英語華語个雙語教育,大家个英語程度會提高當多,華語現代應用當熟練,但係對祖先文化个了解,祖先文化个歷史,會慢慢添放忒。因為語言除忒做交通工具以外還係文化个載體,無自家个語言就無自家个文化。客家話本來在台灣就當弱勢,係講加入華英雙語教育,定著無辦法繼續推展客話个教育。在電腦媒體恁發達个時代,客話毋用學校來教,定著會在這代人个身項失落忒。
推行英華雙語教育,看起來係一個政策定定,毋過佢背後个影響,係會消滅語言、消滅文化个大轉圜,客家人,關心客家文化个人,係毋係又會食睡毋得了。