生廖死張 生張死李 生李死譚
【文/何石松】
發音人:何石松(海陸腔)
所謂生廖死張,生張死李,生李死譚,係講在生時節姓廖,死後恢復本姓張;在生時節姓張,死後恢復本姓李;在生時姓李,死後本本跈爺姓譚。仰般會恁樣生死無共姓,主要係為了報恩,避難,過房等等飲水思源,一片善良介民族本性,毋單淨能夠接續了父系血統介祖德流芳,還兼顧了母系介血脈傳承,在世界上係非常先進,又難能可貴介。
聽講元朝時節,因為天下大亂,百姓像雞仔飛到滿廳下,狗仔跳上桌共樣,生死茫茫,無落無著介逃難。該下,漳州府雲霄縣有個後生人,也舂上跌落介四處避難,正經係「爛鑊煎油――出外香(鄉)」。來到官陂該隻位所,受到當地廖化介欣賞,招為婿郎,並改名為廖元子,佢對廖化像親生爺哀恁樣有孝,一生人為廖屋打拚。48歲時節,單丁子友來出世。
當時,廖家因為官司纏身,元子奉獻所有精神,全力打官司,無奈何拖拖挷挷昶多,延纏多年,還吂結案,愛離開人間時,特別交代友來:「𠊎俚受著若姐公姐婆介痛惜之恩,本愛捨身圖報,不能如願,你愛替𠊎報答,以後子孫,生愛姓廖,來光母族;死當姓張,以存子姓,生死不忘,張廖兩全。」這就係生廖死張,也安到廖皮張骨,係為了感恩又重視母系介夫妻雙姓。
也有為了避禍,來變雙姓介。傳說,廣東普寧鎮南溪等四村介開發者李涵江,厥徠仔李龍,在分創下尾四村以後,繼續發揚厥爸滿哪仔鋪橋施路,熱心公益介家風,所以名聲當好。無想著,嗄恁樣來得罪人,講佢圖謀造反,朝廷知著,黏皮派兵前來捉人。
李龍聽著這會㓾頭介消息,一時之間,嗄戇神戇神,斯像「風吹芒婆――無好靠」共樣,不過,深入思考以後,認為逃走,可能無採工,更增加朝廷介疑狐,為了保護李屋介香煙血脈,突然想著一隻良策:就係遽遽派人通知下尾各村,即時摎李姓燈籠拿下來,換掛張姓燈籠。等到官兵來到時節,無看著李姓介村仔,搶救著全部李姓村民,從此以後,就摎李姓改為張姓,來報答張氏救命之恩,一直到過身,正恢復李姓,𠊎有一個竹東朋友,就係恁樣,安到生張死李,正經係祖德流芳。
在明朝時代,上杭一位姓譚人,在外鄉,因為「一朝干戈起,十年不太平」,嗄無辦法轉屋,無奈何就在河源落食,為譚氏一世祖。經過三代以後,有兄弟四儕,又徙到龍南位所去,恁衰堵著山賊,加上天災人禍,心情艱苦,斯像「牛皮做遮――難過日」共樣,好得當地姓李兄弟,全力𢯭手,渡過難關,還結有姻親關係,和諧快樂介過日仔。無胚著,李屋嗄緊行衰運,譚氏顛倒緊來緊旺,但是因為流浪在外,無戶籍,一直就用李屋介戶籍,將就斯摎譚姓改為姓李。
後來,有一位譚姓阿伯,在八月半暗晡,發一隻夢,看著一個白鬚老人家,手擎等拐棍仔,開容笑面當慈祥介摎佢講:「𠊎係這李屋介開基老人,頭擺做過已多好事,拜託你摎𠊎設隻神位,分村民祭拜。至於感恩改姓之事,你兜介誠意,𠊎兜心領咧。不過,希望你兜死後改為姓譚,也好去見你兜介祖公啊!」所以,碑石頂正有「生李死譚」介碑文。除此以外,也還有因為毋會降細人仔,用過房介方式來解決介,該就係「生薛死許」等等,係一種非常特殊介文化,比起其他各國,係非常先進介。。
總講,這「生廖死張,生張死李,生李死譚」,處處充滿了朋友之間,淰淰介情義,也兼顧了母系血脈介重視,隨時飲水思源,不忘本心,世世代代,散發等祖德介芬芳。
※本文的「介」為大眾通用的「的」,同教育部訂的「个」之意。