楊梅矮坪仔莊屋 上砂海陸客
【文、圖∕徐貴榮∕國立中央大學客家語文暨社會科學學系兼任助理教授】
發音人:徐貴榮(四縣腔)
楊梅矮坪仔莊屋公廳(圖1)在瑞坪路315巷12號,起到山排上,環境清幽,屋前開洋,有一口大陂塘。來台祖16世宸讓公有七兄弟,佢座盡細。在清朝雍正9(1731)年農曆4月28日,十四歲个時節,大哥過身吔!跈等二哥六兄弟,從廣東省惠州府陸豐縣吉康都上砂鄉(現揭西縣上砂鎮)過海來台,講海陸。
圖1 民國83年落成个新公廳「錦繡堂」全貌,大門「天水堂」(莊朝賢先生提供)
宸讓公起先在淡水上陸,第二年,阿姆過身,恁多兄弟又轉去原鄉,順續整修阿爸(15世)梅玉公个風水,到今有290年吔!到這下還完整無修過(圖2)。
圖2 目前在原鄉上砂个15世梅玉公風水,碑石刻等雍正癸丑(11、1733)年,六大房仝立,到今還在。(莊朝賢先生提供)
過後恁多兄弟又過來臺灣,先到新店開墾,又經過幾下年,包尾來到這矮坪仔墾殖發展。毋知仰般?六兄弟到今就伸着宸讓公同五哥宸炯公在楊梅傳下來,其他个阿哥全就毋知哪去吔,到今還尋毋着!
宸讓公討廣州番禺人王氏,降展蒼、展貴、展德三個倈仔。第二個展貴,分共下來臺灣个叔伯老弟宸炳做倈仔,大約在乾隆30零年个時節轉原鄉上砂去吔!到這下同臺灣這位還有聯絡。第三個展德,分五哥做養子,在矮坪仔南片開墾。長子展蒼公討葉氏餔娘,在本地發展,降仕雲、仕敬、仕仙、仕法四個倈仔,分做四大房傳下。
矮坪仔這所在,聽講同上砂原鄉當相像,一出街路就蹶崎上山,全係山排山窩、山坑山壢,良田當少,甚至宸讓公當時起个屋就當像原鄉个老屋。開墾个時節,全愛用一钁頭一畚箕,改泥挖石,開山打林。初期除忒少部分个田做得蒔禾仔以外,大部分僅可種茶、種果子,種兜番薯、番豆、包黍這兜雜作,非常个艱辛。經過兩子爺煞猛个同心合力,開墾面積慢慢仔擴大,到四房孫仔成人過後,開墾个面積就異有成果吔!東片山下食水坑到峎頂,向北一直到頭重坑,南片到龍潭乳姑山下,這一搭仔个所在,差毋多就係莊屋个!總面積大約有75甲恁闊。大約到咸豐10(1860)年起好公廳(圖3),創立展蒼公記人、嘗會。後來賺有錢欸,又在安平鎮大坑缺買加大約25甲个田地。
圖3 莊屋舊公廳樣式(莊朝賢先生提供,2021.11.25翻攝)
到日本時代,明治44(1911)年,莊屋四大房正分家,二房仕敬公後代分着安平鎮大坑缺个地,20世乾蘭公起公廳服祀阿公婆,其他一、三、四這三房還係共下在這矮坪仔耕地。四房較有賺錢,20世全富公還識在西片山排、東片山下平地,各起一間雙堂屋,每間三百零坪,非常个派頭。毋過當打爽,到這下人緊搬出去,屋仔差毋多塌忒、橫忒,伸着一息仔遺跡咧!民國83(1994)年新公廳(圖1)起好過後,二房又同阿公婆徙轉來新公廳共下祭拜(圖4)。到民國102(2113)年,政府核准成立「祭祀公業法人展蒼公管理委員會」,定時祭拜祖先。
圖4 公廳內个阿公婆牌(2021.11.24攝)
莊屋開墾个所在,全係山林高岡,良田少,生活較苦,全愛靠出苦力,故所莊屋人勤儉煞猛,早䟘三朝當一工,正有今晡日个發展,一旦都當重視祖先个祭拜以外,也當感謝神明个保佑,正做得風調雨順,人畜平安,順序發展。故所,對地方頭重坑个三元宮三官大帝信仰,也毋會輸人,整廟樂捐,每年平安戲、節日祭拜,從來毋識漏忒。展德公後代21世莊阿立在昭和年間,還做過頭重坑三元宮倡議建廟个主任委員,地方民眾當欽服。
莊屋異出丁,後代人口多,到今傳到27代吔!子孫開枝散葉,在各行各業認真打拚,都看得着莊屋人。
(本文感謝莊屋大房傳下23代錦沐、錦揚先生,四房傳下24代朝賢先生接受參訪、解說,並提供族譜、相片參考)
※本文的「着」,同教育部訂的「著」之意。