ReWood森林循環湖口創生
【文、圖∕薛常威∕國立中央大學客家語文暨社會科學學系在職專班碩士】
發音人:薛常威(四縣腔)
在新竹湖口有一間火炭工廠,這係「木酢達人」負責人陳偉誠个父親个火炭家業。火炭算起來係當傳統个產業,毋過經過一群後生人用燒火炭加工出來个木醋做得變成當環保个清潔用品。
「木酢達人」摎壞忒个果樹,學校肚,大路脣剪下來个樹仔拿來燒火炭,當多本來生蟲个樹仔,農民免費送分佢,還當感謝佢兜𢯭手,提煉出來个木醋正分農民。「廢材乜做得變黃金」,除忒燒火炭、木醋液等商品,這暫仔佢兜乜開發出木炭盆栽。
2021年陳偉誠又成立森林循環湖口創生青年工作坊,來教後生人利用攉忒个樹仔來做家具,善用樹仔,用森林循環打造生活風格。這年開始,佢兜打造再利用伸著木材之新團隊。其實學校肚、大路脣當多樹仔係當砸、當老个,毋過成時堵著風搓會橫忒,係生昶高大,乜愛剪忒一息仔。橫忒,剪下來个樹仔又盡難處理。佢兜摎以前台灣無麼个人愛个學校肚,大路脣剪下來个樹仔修剪回收,焙燥再利用,做得解決三個問題:1.多元木材料做得用做循環經濟;2.師傅摎學員做得返鄉學習新技術;3.邊料、伸料還做得做生物炭摎木酢液。
佢兜已經成功連結七樣無共樣產業摎三十家企業共同參與來開發新產品,創造精彩个REWOOD國產木材、生物炭摎木酢達人等一系列森林生活風格个產品。
佢兜乜有做綠建材,期待提供建築師、設計師做得追溯摎安全便利使用个原木材料摎各樣生材,期待做得變做建築裝修工程个新概念摎新倡議,用森林循環打造生活風格。