舊相片講古
【文、圖/彭欽清/國立政治大學退休教授】
發音人:彭欽清(四縣腔)
這張相片應當係1927年邊仔翕个。肚項个老人家係吾婆,著和服過絲帔老个兩儕毋知係麼人。
吾婆係銅鑼圓潭仔曾屋人,先嫁到五穀岡謝屋,謝屋阿公轉家,正嫁分歇在雞隆仔个吾公,帶身項來,降吾姑。
翕這張相該下,吾婆係歇在大湖个水頭寮,吾公在墾首之一个謝屋開个酒保(福利社)做承勞仔,負責腦寮个補給,吾爸在庒役場食月給,吾大伯、三叔同細叔耕水頭寮陳屋个田。
吾姆講,吾公毋識字,毋過盡有記才,十過个腦寮行一轉,哪家缺針線,哪家欠油鹽,總下記得,轉到屋講分吾爸聽,列出清單,等下二轉愛去腦寮該下,正去酒保該領補給品帶去各腦寮,半項就毋會跌忒。
吾這桍會對雞隆仔徙到大湖,係因為吾太掌工寮分原住民㓾著過身,吾伯公就去同人做長年,吾婆太同吾公在屋下耕種。吾太兩公婆降兩個倈仔過一個妹仔,妹仔細細仔就喪忒,兩峎背有一個共樣姓彭个兩公婆,淨降一個妹仔,缺嘴,該妹仔無幾多歲仔,爺哀就死忒,吾太兩公婆就同佢接轉屋下來,渡到大正嫁到南湖坑尾个陳屋。
吾伯公過吾公各各結婚降子,地毋罅耕,吾公帶等吾婆太、吾婆過四个倈仔到大湖水頭寮,同陳屋耕田。吾姑同姑丈留在八燕坑,吾姑丈係招个,係共莊个廖屋人,謝屋阿公个風水就分吾姑丈掛。還細時節去八燕坑掛掃該下,成擺仔會堵著吾表哥在該掛謝屋阿公,會順續仔拜。
吾姆嫁分吾爸該年(1925),吾婆太轉家,食到八十大零;第二年吾伯討親,吾婆過身,正食著五十五歲。
相片項个吾婆著等長个大衿衫、烏色个大褲腳褲過勾觜鞋,戴手鈪,聽講係在竹篙屋吳屋伙房翕个。吾婆置這身衫褲、鞋過手鈪,怕使有多少仔,有可能係歸家屋人煞猛打拚恁多年,又會理家,多少仔有藏兜仔,正置得起。
吳屋係盡早來大湖開莊个,1862年吳定新、吳定連兩兄弟帶等隘勇過佃戶對新雞隆翻山過嶺到大湖,同原住民相㓾,死忒已多隘勇過佃人,骨骸放在下廟仔,就係下後个義民廟。
吳屋同彭屋平平共樣講海陸,又係新雞隆來个,水頭寮到竹篙屋無已遠,兩家有來去。有可能翕相該日係去食酒抑係麼个,吾婆正會著到恁體面。該著和服過絲帔老个有可能係兩公婆,會係吾爸个庒役場同事抑係熟事人無,這下無人好問了。
吾姆講,吾婆尾項擔著病,人改常,已毋好服侍。轉家了先葬在大湖,撿骨過後同吾太兩公婆在八燕坑合共門風水。吾公1946年過身,葬在大湖,骨骸牽起來轉八燕坑寄岩一兩年,正擇日仔同吾太厥爺哀、吾太兩公婆、吾婆過姑婆彭姑娘做共穴風水。
一張舊相片有盡多古好講,聽老人家講,吾公盡毋好翕相,有一年去北埔祠堂祭祖,翕團體相,佢企在盡尾排,正翕著半隻頭那。係講翕吾婆這張相該下,吾公有共下翕,又還較有古好講。