豬嫲乳
【文/葉金華/永和國小教師】
發音人:葉金華(四縣腔)
臨暗仔下班時節行過市場看着有人在該位賣豬嫲乳,分𠊎試着盡懷念。𠊎順續仔買了一抓帶去阿姐屋下,因為厥手藝好、當會煮食。聽阿姐講佢還吂讀小學个時節係電視兒童,常透看个節目就係「傅培梅時間」,老古人講「三歲定終身」,難怪佢一踢三通1恁會煮食,食過麼个美食,就曉得做出共款个味緒。
豬嫲乳个華語名仔安到「馬齒莧」,有可能係因為厥葉仔外形有兜仔像係馬仔个牙齒。吾學校个草坪脣就生了幾下頭豬嫲乳,佢兜看起來毋打眼、盦盦覆生在低低个地泥項,天生天養毋驚烈烈个日頭晒。這種野菜雖然滿哪仔都看得着,毋過嗄無麼个人認識佢,在都會个市場項也罕得看着有人賣。厥種類異多,開个花色也有當多款,其中開白花个莖較嫩、較好食。
上一回𠊎帶吾班項个學生仔讀繪本《昆蟲麻醉師-泥蜂》,𠊎毋單淨教大家讀文字,也有教佢兜認識頂高畫个植物摎動物。裡背肚个圖畫就有豬嫲乳,𠊎試問一下學生仔:「有人知這種植物个名仔係麼該無?」,竟然無任何人知曉這種植物个名仔!也有當多小朋友講佢兜毋識看過。歇在都市个人,利便个生活過慣勢了,摎大自然个距離變着還遠哪!好得有方便个網路媒體,𠊎尋兜資料紹介豬嫲乳,傳在班項家長个Line群組,分大家有機會認識這種植物。
起先識聽老人家講古,傳說唐朝時節王寶釧苦守寒窯十八年,佢咬薑啜醋過等艱苦个生活,逐日拿來充飢个野菜就係豬嫲乳,豬嫲乳做得講係饑荒年代个救命草。聽人講頭擺莊下人蓄个豬嫲降了豬子,佢兜煮汁水會特別加入這種草分豬嫲食,食了豬嫲乳个豬嫲乳水較足,飼个豬子會大較遽。
摎豬嫲乳擇過、洗淨、瀝燥了後,磡兜仔蒜頭仁、切兜仔豬肉絲。先摎頂高這兜食材準備好勢,續下來摎油倒入鑊頭,等油變燒就放蒜頭仁菣香,攞等豬肉絲炒出香味了後,摎豬嫲乳放下去、鑊仔邊脣倒一滴仔水,豬嫲乳自家會出水,故所毋使放忒多水喔!放兜仔鹽、猛火共下炒,弇鑊蓋分佢略略仔熻一下,續下來關火、摎菜撩起來裝到盤仔項。阿姐做事情手腳盡遽,毋使幾分鐘个時間一盤燒熝熝、青里里盡餳人食个豬嫲乳就炒好了!
這盤香噴噴个豬嫲乳食起來个口感有兜仔像炒荷蘭豆苗,味緒清香,毋使講有幾好食哩!喺!趕燒食還好食哪!一下仔歸隻盤仔个菜就分大家食忒了。煮食正經愛有天份喔!
注釋:
1. 一踢三通,三踢無鼻公:比喻靈巧的人舉一反三,遲鈍的人舉三都反應不過來。