伯公神助攻
【文/彭賢祥/桃園市客語薪傳師】
發音人:彭賢祥(四縣腔)
伯公在客家莊係保護神,滿哪仔就看得著伯公,逐儕看著伯公廟,乜會入去拜喏,還有逐隻月初一十五,共樣會去伯公下上香,故所伯公係大家个好朋友,係信仰中心、係做好事辦活動个所在。
桃園市係伯公廟盡多个位所,總共有兩百五十五間,比便利商店還較多,毋單淨係密度最高个,還有當靚當新个伯公廟,乜有特別个伯公廟,就係伯公摎伯婆共下歇个,有用石頭雕刻出來个伯公廟,正經係麼个樣式都有,識聽過水頭伯公、樹頭伯公、茶園伯公、田頭伯公……無?講起來乜當生趣,連公部門个人,也跈等共下來推廣伯公文化,敢係伯公在个變奇術?
桃園市政府客家事務局為著推廣客家話,就去邀請伯公來𢯭手,特別邀請專門做桌遊个專家,研究設計出來个「伯公神助攻」,主要係有三十六張牌卡,分做美食、文化、景點三類,逐張牌卡个客話,都有客語拼音,可以讓搞桌遊个人,學拼音講客話,在搞桌遊个時節,毋單淨愛開嘴講出來,還愛講正確來,正做得過關,除忒這兜以外,還有最重要个就係「伯公卡」,伯公卡有八張,逐張伯公卡有兩種神力,做得偷看別人个牌卡也係摎別人个棋仔對換…等,毋過愛用這伯公卡無恁簡單,愛用客話講牌卡上背个師傅話,講對正做得使用這神奇个伯公卡,所以這種客語桌遊,做得學拼音師傅話,在地个美食文化景點,實在係當湛斗个桌遊,一定愛好好仔來推廣。
就係因為這桌遊恁餳人搞,在搞桌遊中學客話,印象特別深刻,毋多知仔就學會客話,乜做得燒暖摎屋下人个感情,所以時行个桃園市政府客家事務局,特別舉辦伯公神助攻桌遊研習會,培養桌遊个桌長,毋單淨恁樣,還去當多國小裡肚推廣,舉行桃園市第一擺个客家桌遊比賽,盡多小朋友報名參加,比賽該日鬧熱煎煎,大家都搞到毋肯轉,像這種活動愛輒常來舉辦正著。
最尾愛用簡單个客話來表達,這盡好搞个客家桌遊:伯公出來咧!伯公搞當大,伯公神助攻,講客个桌遊,牌卡學拼音,轉變个客家,時行个桃園,第一擺舉辦,第一屆桌長,現代个伯公,伯公桌遊慶!