拜新丁
【文、圖/鍾榮富/南臺科技大學應用英語系講座教授】
發音人:鍾榮富(南四縣腔)
南部客家風俗,秋收以後,過年之前,會舉辦「完福」祭典,這係一年中最後个重要祭典,大部分村民都會來。「完福」愛祭天拜神,感謝天公賜福,酬謝天地眾神分人民帶來風調雨順,五穀豐登个意思。不論收成好壞,有災無災,老百姓都會借「完福」个名譽,分大家辛苦一年之後,好好仔轉擺一下。「完福」个重頭戲在「拜新丁」,庄內只要有新生男丁之家,會準備橢圓形个紅粄仔,背上印等各種粄印形式,有龜背型、長壽型、八仙過海型,款式繁多,爭奇鬥艷。拜過新丁,送神歸轉天頂,爐主開始唱名分粄仔,家家戶戶喜樂洋洋,參與大眾在炮仔兵崊蹦巄(pin-lin-piang-liang)之中,互相祝福,行歸屋下。
完福典禮由爐主主持,庄上有名望个前輩圍等佢,親像天上个眾星拱月,讓爐主看起來特別莊嚴、光彩。爐主著藍衫,表情嚴肅,完全遵照司儀个唱詞進行,講上香就上香,講拜就拜,講跪就跪。司儀个唱聲嘹亮,有時高,有時低。四週圍等稠稠个香煙,濔漫了村民个眼神。遠遠望去,看到人神交會,不同个人影同神影相互交叉,來來去去。每年完福祭典過後,愛請神明選擇下二年个爐主。分神點著个人,心存感激,歡歡喜喜。台中个東勢地區,有「新丁會」个組職,主祭者由會員輪流擔任。傳統就恁仔代代延綿到今,毋識停過。
添丁个家長其樂融融,正無閒忒田上个事頭,汗都毋曾燥,心中就開始籌畫做「新丁粄」个工作。早期,家家戶戶都愛親手做粄仔个時節,從擇米、磨漿、過濾、粄滯、搓粄、添香、包餡、印模、上紅等等程序,每一項都愛細心細意。蒸好新丁粄,還愛去看左右鄰舍有問題無,係有,愛盡量去添手。家中出丁,係值得高興个事,總係希望完福該日,大家都能夠圓滿順利。傳統客家新丁粄,有包餡个,有毋包餡个,有兜人全部染紅,有兜人淨染腰帶,不論哪種,都愛看起來有紅紅个喜氣。新丁粄同一般常見个粒狀紅粄無共樣个所在,在外形同粄印。新丁粄係橢圓形,有明顯个粄印,一般个紅粄,捼到圓圓,無粄印。現在人,新丁粄已經委託專業製作,一通電話,廠家馬上送到,雖然方便,但係失去了頭擺大家互助互動个氣氛。
近幾年來,六堆个佳冬地區將完福並拜新丁个活動,徙到過年同元宵節之間,擴大舉行,同名聞全台灣个東勢「新丁粄節」,共樣引起全台灣人个注意。佳冬係古屋、古傳統保存特別多个所在,當地人尋來原鄉福杉製作个「福廠」,選定舊曆正月11,用客家八音伴奏,一路將伯公請到福廠,當夜就舉行祭天拜神,完成「完福」个程序。第二日朝晨,村民行九獻禮拜伯公,家中添丁(無論男女)个人,準備新丁粄同其他供品,前來祈福。三山國王、媽祖也請來同伯公共下受人祭拜,這第二日个活動,就安到「拜新丁」。