從隹、鳥兩字來看客語个特殊詞語
【文/范文芳/國立清華大學中國語文學系退休教授】
發音人:范文芳(海陸腔)
ㄧ、從最早个字形來看
1. 隹,象形字,描畫細形、短尾个鳥兒。
2. 鳥,象形字,描畫大形、長尾个鳥兒。
3. 後來漢字增多,就無一定完全遵從裡種原則,故所雞、鷄兩字通用。
二、從組字个方式來看
1. 隹可以擔任漢字个形符,有表意个功能,像雀、雞、隼、隻。
2. 隹可以擔任漢字个音符,有表音个功能,像唯、維、惟、誰。
3. 鳥可以擔任漢字个形符,有表意个功能,像鳴、鵝、鴨、鴉。
4. 鳥可以擔任漢字个音符,有表音个功能,像島、搗、裊、梟。
三、從字義个延申來看
1. 雀係小形鳥,像麻雀,隼係獵人豢養个猛禽,但是,人面上个斑點安做
雀斑,水準、允准、準備,以上幾个詞語,已經同小型鳥無關。
2. 隹本來指短尾小型鳥,客話講【隹兒】專指雄性生殖器,係名詞,也可以用做形容詞,一般華人講講荒誕不經的話,客語稱【隹話】。
3. 鳥本意指長尾大型鳥,本係名詞,轉成形容詞,華語說妳說的什麼鳥話,客語可以翻譯為【妳講該麼个隹話】,華語稱傻瓜、笨蛋,客語稱【隹子】。
4. 客語用詞特徵,還有另外一種習慣,將鳥字作為動詞用,華語俗話也有【妳不要鳥他】的講法,客語就講【妳莫鳥佢】,簡單翻譯係【妳不要理他】。
5. 客語用詞,還有一種更特殊个方式,係鳥當作動詞,專指人類性交行為,大體上,家畜性交用【相背】、【打】,人類男女性交用【相鳥】,華語俗字用【屌】,台福語借用【幹】字。
四、從字音个變通來看
1. 隹 廣韻職追切,聲母係章,客語有兩音{tsui}/{tsoi}。
2. 鳥 廣韻都了切,聲母係端,客語有三音{niau}陰平調/{diau}陰平調/{diau}陰上調。
3. 隹 依據廣韻聲母應該係翹舌音,但海陸腔也已經變為舌尖音。
4. 鳥 依據廣韻聲母應該係{diau},客語比華語、台福語保留中古漢語个原形。
5. 客語鳥字有三種發音,niau陰平/diau陰平/diau陰上,第一種係文讀音,第二種係白話音,全係名詞,第三種係動詞。
五、感想
一隻鳥字,客語會有三種發音,分別表示在不同个使用情形,會用不同个字音來表示,相對於華語來講,係一種更加進步个語言。