機靈的婆婆
【文/薛常威/國立中央大學客家語文暨社會科學學系在職專班碩士生】
這一段故事講的是下凡的仙女世珍在十字街頭巧遇孝子文瑞,一意要嫁他,當他家的媳婦,文瑞無奈只能帶她回家見自己的母親。
崔母雖然過於老實,有時甚至點失態,但是她同時也是個能夠持家的女性,其實是很符合過去客家女性的形象。崔母自嘲自己是老人家,講話漏風漏風,但是還是很仔細地幫兒子鑑定張世珍,還會故意同樣的問題用四縣客家話跟海陸客家話重複測試她,看世珍是不是精神有異狀。崔母雖然是個旦角,卻多少都具備有機智、俏皮的喜劇人物特質。
文瑞:正經跈等來啊,正經跈來。
世珍:𠊎斯想講偎較頭前兜,驚你走忒,正無愛企到恁旁邊。
文瑞:妳這位等一下。
文瑞:吂愛吂愛,妳在這等,𠊎先落來摎𠊎姆講。
世珍:阿姆喔?講一聲乜好,毋好分𠊎等太久。
文瑞:好,毋好恁緊張。
世珍:𠊎等你一下。
崔母:子啊,你樣形呢,慌慌張張?
文瑞:𠊎摎妳講,有個細阿姐,安到張世珍,講愛嫁分𠊎做餔娘。
崔母:麼个啊,該細妹仔講愛嫁分你做餔娘。恁樣形啊,𠊎看該細妹仔真癲,有問題。
文瑞:阿姆,妳經驗豐富,妳摎佢鑑定看下。
崔母:無恁樣,你渡佢落來,分𠊎轉轉下。
文瑞:愛轉到哪?
崔母:毋係啦,老人家講話就漏風漏風,分𠊎看看下啦。
文瑞:阿姆。
崔母:係哪。
文瑞:𠊎摎佢喊。
世珍:仰般形?
文瑞:張小姐,𠊎姆講請妳落下。
世珍:有影喔,遽遽來去。
世珍:見過婆婆。
崔母:等下,𠊎會驚著,喊𠊎喔?
世珍:毋係啊,歡喜講無正,見過婆婆。
崔母:慢等慢等,一見面就喊𠊎婆婆,𠊎看佢喔,頭那有問題。𠊎來摎佢考驗考驗。
崔母:細阿姐仔。
世珍:婆婆。
崔母:毋好喊恁遽,係無,𠊎愛先看下。𠊎來問妳,妳知𠊎屋下當苦喔。
世珍:𠊎知啦。
崔母:𠊎个屋頂,係會漏水喔。
世珍:𠊎乜知啦,入來就看著了。
崔母:入來就看著了。𠊎這矮屋喔,過來就愛低頭。
世珍:無要緊,這係應該个。
崔母:恁樣啊,𠊎再過問妳一下,妳喔,麼个名?
世珍:𠊎張世珍。
崔母:張小姐。
崔母:𠊎再過問妳,妳幾多歲?
世珍:𠊎今年十八歲。
崔母:十八歲,恁形啊。𠊎問妳,妳麼个名?
世珍:張世珍。
崔母:呦,第二擺問還共樣喔。問加擺,妳幾多歲?
世珍:十八歲。
崔母:十八歲喔,奇怪啊。
文瑞:毋係,妳共樣个問題,仰會問恁多擺。
崔母:唉喲,𠊎挑工試佢仔啦,看佢个頭那有燒壞忒無?
文瑞:當正常係無?
崔母:當正常喔。
文瑞:該妳做主喔。
崔母:做主斯做主。問題係屋下恁樣形,妳嫁分𠊎兜斯會當苦當苦喔,無好食喔,三餐做一餐。
世珍:婆婆妳放心,𠊎世珍愛著崔文瑞,較艱苦个日子𠊎也過,不管有錢無錢對𠊎來講,無要緊,對𠊎無重要啦。
崔母:恁樣形,好啦,人講,人到時就到,分你兩儕完婚拜堂。
文瑞:蛤,恁遽喔。
崔母:唉喲,看今晡日當好个天,遽遽拜堂。
文瑞:今晡日可以,阿姆做主,𠊎聽妳話。
崔母:恁樣,裡下拜堂,𠊎摎你講,奏樂。
偎va31:依憑、靠著、偏向。
挑工tiau24gung24:故意,刻意。
人到時就到:人到了就是最佳時機。