ng24ng24, said to infants, when being held out(摎嬰兒仔兜屎該下出个聲)。原在个嬰兒仔,三、四個月仔大該下,做爺哀个(阿姆較多)就愛同佢兜屎兜尿。做阿姆儕緊兜屎會同嬰兒仔緊講ng24,也就係屙屎出力个聲,故所會聽著大人同嬰兒仔共下在該ng24ng24滾,大人細子都另屎另到面紅濟炸,上氣接毋上下氣,正經係母子連心。
o11 o11,sound used when putting a child to sleep(拐嬰兒睡目該下出个聲)。嬰兒仔想睡該下,大體仔會噭會蹻人,大人就愛拐佢睡,無論係揇等、揞等就愛輕輕仔拍抑搖,還愛發出緩緩仔、柔柔仔過有節奏个o11 o11聲,世界各地个搖籃曲基本上就係用這種基調同節奏个旋律。
am31, to feed a child with the hand(用手飼細孲仔食)。嬰兒仔斷乳過後,就愛飼較軟个食物,像粥、水粄仔等等。原在較苦个人家,無閒也無恁多米來搣這兜東西,大人就將飯先噍到綿綿,哯到手指項飼細人仔食,手指愛放到細人仔个嘴之前,大人會先講am31一聲,細人仔聽啊著就會嘴擘開來。
ta 31tsia11, an expression used when playing with children(弄細人仔該下出个聲。)。大人面向細人仔,兩隻巴掌嫲向自家,遮等面,突然間打開巴掌嫲,同時喊tsia11个聲,細人仔一下仔看著大人个面,又聽著tsia11个聲,嚇一下,就會呵呵滾緊笑,在無麼个東西好分細人仔搞个時代,這係盡利便又做得增加親子互動最好个方式。
ta 31 at 5 chhi55(tshiu55), to sneeze(打哈啾)。人吹著冷風抑寒著,都會打哈啾。既然係狀聲詞,各地个人聽著个會無共樣,這本辭典記錄个係at 5 chhi55過 at 5 tshiu55,都有保留入聲at5,臺灣个客話係hat5 tshiu55。
kit5kit5 kep5kep5, noise of disturbed water(水激著个聲)。原在人屋下用个水,大體仔係去井項打無就去水圳㧡,桶肚个水會緊激,故所愛慢慢仔行,水正毋會激出來。㧡屎㧡尿愛還較細義,係講激出來,會搣到自家臭肨肨仔。
kong24 kong24 kap5 kap5, noise of the waves; also of pigs eating(水浪个聲;乜係豬仔食東西个聲)。海過深潭个水係堵著風較大兜仔就會起浪,浪打浪个時節會有聲。還過用碗這兜東西裝湯,係講裝較淰兜仔,兜起來輒輒乜會kong24 kong24 kap5 kap5。豬仔食汁用嘴筒緊冒豬兜肚个汁緊呷,就係kong24 kong24 kap5 kap5,臺灣四縣話講人好亂講話會講“恁kong24 kap5”。