鷂婆山下个帝王柑
【圖/文/彭賢祥/桃園市客語薪傳師】
發音人:彭賢祥(四縣腔)
十二月底愛過年了,去市場滿哪仔都看到柑仔,青黃青黃色个皮,看起來當打眼,特別係今年無風搓打當結,乜係大出个季節,便宜又好食,在臺灣麼个水果都有,單淨柑仔个種類乜係盡多,有椪柑、桶柑、柳丁、砂糖橘、帝王柑,你好食哪種柑仔?
七年前會兼年个時節,去彰化田尾公路花園尞,該位係臺灣果苗集散地,你想毋著个果樹,去該位就看得著,也係你想愛買个,北部尋毋著个,去該位一定尋得著,還有當多間做得去比較,就係因為恁樣,正會變到當多人,人多車仔就多,所以當會塞車,毋過為著愛在老屋脣種柑仔,塞一下車無關係!
講著老屋,就會想起禾埕前面摎屋後背,以前个李仔園嗄變著菅草生到塞塞,看著實在當打爽,故所七年前二哥有在彰化田尾公路花園,買兩頭帝王柑,用機車載轉去,老屋禾埕前面偎牛眼樹這片,有試種兩頭帝王柑,第二年就有打幾下粒,食起來異清甜,所以正會想愛來去,買加幾頭仔轉去老屋脣種,打算愛來種柑仔園。
就係因為有試種過帝王柑,皮薄肉色靚水份多,食起來當清甜个品種,正會摎二哥鬥股來種這帝王柑,所以在五年前冬下頭,𠊎駛車仔去到彰化田尾,選一間果樹看起來較靚,擇二十八頭帝王柑樹,加上之前个兩頭,堵好三十頭,就用車仔載轉老屋山頂項,買著帝王柑樹,跈等就愛來種落去,毋過愛種之前,還愛先摎菅草撥忒去,菅草頭愛用钁頭挖起來,泥敲忒分日頭晒燥來,恁樣菅草正會死忒續下來就愛來挖窟仔,窟仔愛挖幾大仔?麼个形?幾遠仔一窟?這全部都愛先算好來,毋過𠊎毋係專家,所以就大約仔量一下尺寸就種落去,𠊎摎二哥輪流挖窟仔,愛挖圓圓个窟仔,闊大約六十公分,深愛看根有幾長仔決定,頭摎頭差毋多愛兩公尺遠,就用這種方法種,在禾埕前到路面種二十四頭,屋後背種四頭,搣忒日半實在有罅悿,做到腰拑背吊,手連食飯擎筷仔就會緊顫,毋過想起帝王柑清甜个味緒,跈等手摎背囊个酸痛就毋見,因為想做个事,就係消除酸痛最有效个藥仔。
吾个老屋係在苗栗摎泰安合界該位,老屋禾埕个右手片有一座山,行出來禾埕就看得著,該座山安到鷂婆山,故所吾種帝王柑,就安到鷂婆山帝王柑,正開始種第一兩年,打个柑仔又大又結,毋過第三年開始,在樹頭下看著有樹粉仔,用竹仔去挖,樹皮係空殼个還看著有蛀蟲,樹頭分蛀蟲咬到疤疤,還有熱天个時節,在樹枝項輒輒看得著天牛停在上背,這種天牛係斑星天牛,專門係會咬柑仔樹皮,摎樹皮喫到肉出出,實在當得人惱,這兩年仔分天牛搣到無閒洎杈,毋單淨產量少,柑仔皮有烏點毋會亮線,柑形乜當奇怪毋會圓,無剪枝矮化緊生緊高,搣到無結無煞?
鷂婆山帝王柑園,係𠊎摎吾二哥鬥股種个,雖然二哥在這個月突然間過身,心糟糟無定無著,轉去老屋看著柑仔園,心肝肚愐著就想愛,摎這帝王柑救起來,讓這帝王柑緊來緊大頭,毋會分這天牛遰病,柑仔逐年大出,乜希望二貨仔在天頂,保護𠊎摎這帝王柑好好管理,做得讓帝王柑在鷂婆山下長命百歲,恁樣正有共下懷念个價值。