黃金果收个時節
【文、圖/鍾榮富/南臺科技大學應用英語系講座教授】
發音人:鍾榮富(南四縣腔)
黃金果係外來種水果,屬於山欖科,聽講原來生啊在南美洲个亞馬遜雨林區,果籽分人帶去南洋播種,再對南洋飄海過來台灣。果子表皮金黃光亮,外形親像桃仔,頭平尾尖,擺做歸盤仔,更加好看。黃金果切開來,內部會流出白色个黏汁,像牛奶,果肉蓬白、光華、幼嫩,食起來軟軟沙沙,又脆又滑,甜度高,鐵質多,盡爽口。
當初會種這種水果,完全係「目瞎人尋金仔—無堵好撞著个」。𠊎該兩分地原本借鄰舍種黃梨,後來黃梨敗價,佢煞歸園送還𠊎,害𠊎食了歸半年个黃梨,於今看著黃梨就著驚。養地(就係讓地去荒、去生草)幾年後,有一日上網去遶遶仔,有人講黃金果係入門農夫个試金石,好種、好收、又好價。天下哪有恁好空个事頭呢?毋相信就去買了五十頭歸來種。正經哦,五月節正種下樹苗,隔年就開花結果,每一頭都打到幫滿。
第一年大豐收,歸屋下都係黃金果,桌上、音箱上、書櫥上,到位都放等金黃金黃个果子。可惜文人自古面皮薄,𠊎毋敢拿出去賣,全部塞分鄰舍、朋友、親戚,每日都愛拜託朋友代銷。後來,吾嫂看毋過去,接手經營。佢本人農家出身,同厥爸共下種檳榔幾下年,務農經驗豐富。換手之後,佢去上課學接種、學掖肥、學埋管淋水,無半年,園仔看起來完全專業化,清爽、齊整、樹歸樹,草歸草。現下農作耕種,講究養生、強調有機,還好在黃金果多葉,毋使農藥,只要好好修剪,蟲害毋多。
吾嫂厥爸舊年80歲生日,宣布退休,轉手輔導後生,將厥兩甲零个檳榔園轉分吾嫂經營。一下手,吾嫂嗄無閒洎杈,「自家都顧無歇了,還講愛去顧佛祖」,高不理將,又將果園丟還𠊎耕。
𠊎平常時無閒看論文、讀書、編書、寫稿,差毋多每暗晡都愛無閒到半夜,難得有機會出去曬日頭。接下果園工作,每禮拜都愛抽一下晝,親身去修樹芽、淋水、割草、掖肥,但係大部分時間都在這摸該摸,鬆爽筋骨,看日頭落山,看鳥仔做竇。
這季係冬果,雨水少,表皮光亮登黃,果肉結實,特別甜。大者超過一斤,盡細粒乜有七八兩。看着一粒一粒个黃金果掛啊在樹頂上,正感覺着勞力同收成,實在係一體兩面、表裡分都無開。