入年界 講好話
【圖/廖千慧;文/何石松】
發音人:何石松(海陸腔)
今日見面笑連連 講兜好話來結緣
老人聽轉添福壽 後生聽轉大賺錢
阿哥聽了成彭祖 阿妹聽了靚過仙
福如東海年年旺 壽比南山日日健
祝福大家 闔家平安 財丁兩旺
五子登科 子孝孫賢 富貴萬萬年
入年界,講好話,係講逐年到了舊曆十二月二十四暗晡,行落猛禽年獸介地界,為了愛平平安安,快快樂樂過年,毋好分年獸來攻擊,大家同心協力來逐走年獸,就愛多講好話,不管有麼介無歡喜,也愛顧念著全家,甚至於全族介存亡,共下一條心,來過這隻年關,所以愛從講好話開始。
年,根據最早甲骨文介意思,係一個人背等飽飽介禾串,表示禾仔黃咧,五穀豐登之意。因為禾仔一年收成兩擺就過冬,尤其經過入年界介辛苦以後,就變成時間觀念,安到一年,《詩經․豳風》斯講:「自我不見,于今三年。」斯係經過三擺入年界。
禾仔,一年最少可以收兩擺,第一擺在六月,所以安到六月冬,冬,係終結介意思,係上早介小年,第二擺收割,在秋冬之間,安到收秋,就係秋收之意。該下,滿田都係禾仔,當然,就餳了儘多草蜢蟲仔鳥仔來食,吾俚可以發現,秋天介秋,原來係寫做龝,龝,係禾仔黃咧,收成以後,就遽遽放火來燒該兜草蜢,減少損失,所以秋字有火,就愛用火來燒蟲獸。龜,其實毋係龜仔,係講蟲仔介背囊像龜仔樣。
收秋以後,慢慢來到天寒地凍介冷天,這下,山上田肚介作物,全部收淨淨咧,該兜動物獸類食到無好食,結果發現儘多好食介,全部在該人屋肚,所以,一群一群介動物,就想愛來攻擊人類,上早人有幾多分大鵰扡走,有幾多分老虎食忒,還有阿爸,老公,倈仔全部分老虎食忒介不幸事件,可見早期該兜猛禽獸類,對人類介威脅有幾大。
人類經過恁多蒔田割禾介辛苦,豐收之後難得來過年,又愛提防該兜獸類來攻擊,第一步就愛用語言來團結內部,形成和諧介氣氛,一致對外,入年界,講好話,係愛喊細人仔,毋好亂講話,大人乜愛多講好話,細人仔係講毋著話,可以用童言無忌來安慰,毋好打人,也毋好罵人,一片和挼景象,係最好介語言教育。
入年界,仰般愛講好話?該係因為講好話,可以帶分人好介心情,做事情容易成功,人講:送人鮮花,手有留香。仁者正會送人金言玉語,來激發人做事介動力。何況,在新年頭,舊年尾,入年界時,建立信心,用好話來討得好頭彩,該斯一年都順利;係無,像該羅隱介阿姆,無講好話,嗄害著厥倈仔一生人無順利。所以,入年界,講好話,係為了過年介準備,所謂「年初一食齋,當得一年食齋」,共樣,入年界講好話,當得一年好話,像該炊甜粄共樣,無講好話,該甜粄斯炊毋熟,甜粄毋知人,也想愛聽好話,正經係軟水入石,軟語入心,入年界,愛逐該兜年獸,仰做得毋講好話呢?
第二步就係為了提防老虎等年獸來攻擊,斯發分逐儕矺年錢介武器。矺,係壓制,追打,攻擊之意;錢,平時係耕田介工具,危險時節就變為武器,所以,矺年錢,原旦係愛打走年獸所用介,慢慢仔,從二十五入年界到三十暗晡,在大家用好話來團結,共下打拚之下,年獸逐走咧,到了年初一,發覺大家平平安安無仰般,斯當歡喜,緊講恭喜恭喜,直直到年初五,快樂介過年。英國培根講:「因為有語言,你贏了獸類;若係無好話,獸類會贏你。」原來,吾俚毋單淨有語言,還有好語言,逐走年獸,就係入年界,講好話介關係啊。
上早人過年,愛防備獸類前來討食,攻擊,係非常辛苦介,隨時有性命危險,像過年關共樣,係無錢,就舂上跌落無辦法打年獸,所以有入年界,講好話來預防;這下人雖然較好過,但係無錢,日仔共樣艱苦過,所謂「今日二十七,過年長三日」,「三十暗晡打鑼鼓,毋知窮人苦」,意思係講正經介入年界,講好話,愛多多將心比心,用良言一句三冬暖,幫助窮人過年關,再來創造幸福介新年,光明介春天。最後,祝福大家:
十福百福全家福 千春萬春滿堂春
東南西北方方利 春夏秋冬日日順
諸事如意鼠來寶 牛年得意虎年好
年年發達年年旺 年年快樂毋會老
※本文的「介」為大眾通用的「的」,同教育部訂的「个」之意。