平鎮乙未保台紀念公園開園
【文、圖∕徐貴榮∕國立中央大學客家語文暨社會科學學系兼任助理教授】
發音人:徐貴榮(四縣腔)
起忒兩年零,位在平鎮區義民廟東北側角,復旦路、育達路、文化街、石門大圳過嶺支渠之間長三角形所在,總基地面積3.65公頃个1895乙未保台紀念公園,在民國110年11月16開園吔!(圖1)以公共藝術、景觀規劃喚起民眾對乙未戰爭个歷史記憶,認識客家義勇軍个保台精神,傳達客家團結愛土、在地个歷史故事。
圖1 平鎮乙未保台紀念公園平面配置圖(摘自桃園客家事務局客家主題展館網站)
回想127年前个1895乙未年,中日訂定馬關條約,消息傳來,當多人反對割讓臺灣分日本,成立「台灣民主國」,發起對抗日本人佔台个戰爭。雖然講這係「竹篙鬥菜刀」同「洋槍洋砲」个戰爭,毋過桃竹苗个客家人,還係在這開出第一銃,前前後後戰到一兵一卒。根據日本人香風外史(市毛淺太郎)寫个《征臺始末》這本書第三章「安平鎮戰役」裡肚,寫着「知敵方魁首胡嘉猷、黃娘盛二人出沒於安平鎮,乃決定展開攻擊」來看,兩方發生激烈个對打。日本人因為莊園个竻竹圍圍揫打毋落,對6月28打到7月初1,雙方死傷異多,盡尾因為胡嘉猷个井分大砲擲壞,井水食毋得吔,半夜正偷走到龍潭陂去,日本人正順利進入安平鎮庄。
就係過去識在平鎮這位發生保家衛台个忠烈事跡,故所桃園市政府客家事務局同客家委員會爭取前瞻基礎建設計畫,用國家級公園个高度設計,在這搭仔做一個國家級个客家館舍。這隻公園个設計總下係用「圓」做意象,連接分育達路分開兩片基地个「乙未之環」圓環橋,還有半月型鏡面水池、便所、停車場人行出入口,連種个一蒲一蒲竹仔,都係圓形个(圖2)。會恁樣設計,主要係愛展現族群个融合、合作、團結,共同抵抗外來个侵略,喚起客家歷史記憶,象徵歷史就在腳下,愛超越對立同斷裂个意涵。園區會種恁多竹仔,主要也係象徵當年抵抗日軍个庄頭竻竹風圍。
圖2 全區圓形設計,這係停車場人行出入口、竹蒲(2022.01.18攝)
園區設施包括遊客服務中心、記憶展示空間、地下停車場、乙未之環(圖3)、清水模建築、水圳步道、竹園、大草坪、親子共融式遊樂場這兜,係一個有環境美學合有歷史紀念意義个公園,這下變到桃園最新、最好个親子遊尞所在。遊客服務中心在圓環橋下一樓,左片入口落去展示空間,展示內容包括甲午戰爭紹介,恁多擺戰爭過程个時間廊,1895年當時个背景,大湳尾(宋屋)戰役、安平鎮戰役、龍潭陂戰役、大嵙崁戰役四大戰役紹介、戰場意象區,客家文學同起福互動區,義民姓名紀念牆,特展區(主要播放1895乙未戰役相關紀錄影片),出口回轉服務中心个右片。行過乙未之環到文化街,係配合地景設計个親子共融式遊戲場,有溜滑梯、鳥竇晃槓仔、地景山排,做得放心分細人仔爬上爬下,走來走去,盡量搞樂。
圖3 乙未之環(2022.01.18攝)
鄭市長講未來會同歸個園區串連義民廟,設置義民圖書館,變到義民文化園區,並連結邊脣个老街溪行廊,伯公潭、八字圳公園,同時結合在地學校、社區資源,讓環境更加完整。逐年舉辦乙未客家戰役文化季,行銷客家文化摎人文藝術,希望彰顯歷史、結合在地,也盼望客家文化做得行入生活,客家歷史故事做得代代相傳,分還較多人瞭解客家先民團結合作个精神。
這隻公園,毋單止日時頭做得遊尞、參觀展覽館內个乙未保台資料,喚起當年客家人抗日个事蹟,朝晨臨暗仔也提供市民遊客悠閒、散步、坐尞个場所,到華燈初上抑係好天時个暗晡時,附近仔平洋恬靜,在設計个夜景光雕映照之下,也係觀星看斗、談心講愛个好地方。
※本文的「着」,同教育部訂的「著」之意。