閱過山丘 有機書店
【文、圖∕薛常威∕國立中央大學客家語文暨社會科學學系在職專班碩士】
發音人:薛常威(四縣腔)
龍潭算將係台灣當重要个文學藝術个寶地,像文學家鍾肇政,作曲家鄧雨賢,全部係龍潭人。這下个後生人可能毋多知,毋過這文學个種草應該愛傳下去。
三和社區个三元宮,在龍潭三洽水地區,供奉三官大帝,1946年建成。三洽水算起來係當恬靜个所在,斯一間三和國小定。
龍潭在地後生人胡佩寰講,細个時節愛行當遠正有圖書館做得看書,在龍潭个三和國小,歸學校無50個學生,強強會分人廢除忒。這下个細人閒時大體係搞3C產品,為著鼓勵細人看書,希望偏鄉農村个小朋友乜有接受高品質教育个權利。
胡佩寰成立一間有機書店,摎國發會補助个地方創生青年培力工作站「桃園野菱蔓生團隊」合作,花了一隻月个時間共同摎三元宮脣閒置个倉庫改造成「閱過山丘」共享空間,收藏有一萬本个書,分這空間新个生命,提供大量書本免費分里民來看,分偏鄉學童自小培養讀書个好習慣。
「讀書無一定做得改變命運,但是一定做得豐富人生。」佢相信若係愛做有意義个事情,就來起圖書館,分還較多人知讀書做得豐富人生。
(圖片來源:閱過山丘有機書店臉書粉絲專頁)
「閱過山丘」共享空間毋係單淨提供書本分里民看,還有讀書會,手作課程,無定時會舉辦故事媽媽講故事,分一隻細村莊有一隻親子、後生人、民眾友善共下交流學習个所在,達到終身學習个目的。
在恁鄉下,人恁少,細人還較少,旁脣又無麼个店面,無麼个人家屋个所在開書店確實無簡單,乜盡難維持逐日開門。這下須要預約使用,未來志工招募順利个時節正會逐日開放。希望大家做得用實際个行動,來支持後生人為故鄉打拚个理想。