勸伯公
【文、圖/彭欽清/國立政治大學退休教授】
發音人:彭欽清(四縣腔)
十過年前,新聞報導講, 苗栗縣後龍鎮外埔有一仙歸百年个伯公託夢分信徒, 講愛討隻伯婆, 還講這隻伯婆愛面無皺, 頭那毛愛烏, 又愛生來細隻細隻仔. 當地个信眾就請雕刻師父照伯公个意思刻一尊, 擇日仔公開迎娶, 請百過張桌个人客, 大家就試著盡生趣。𠊎就根據這則報導, 寫過一首〈勸伯公〉个詩。
伯公,
聽講你想愛討隻伯婆,
有影無?
又講你愛面無打褶 ,
又毋好有白頭那毛个,
正愛討,
𠊎聽著毋知愛講麼个正好。
你七老八十三了還恁會擇,
人無嫌你就已好哩哦!
作當人毋嫌你,
討恁後生个餔娘,你堪得無?
就講堪得,
敢毋會驚降忒多?
伯公,
𠊎看啊,
莫恁好就會有較好。
愛知喲!
討來好就好,
討來係毋好,
你就會有屙糟齋好食喔!
毋係嫌你忒老,
就係嫌你月給無高,
嫌到你無半垤好。
歸日仔噥噥噥噥,
毋係罵你死孤盲,
就講你恁無才調還敢討,
這種日仔敢好過?
伯公,
𠊎想啊做單身就有較好,
一儕飽就歸家屋飽,
寒天一儕睡毋會燒暖,
蓋加一領被,
揇隻水鴨仔乜就好。
撿採討著个伯婆會凝覺啊,
你就會目金金仔毋得到天光喔!
伯公,
𠊎摎你開一條計好無?
先尋一个來共下歇,
試著係毋好,
做得來尋過,
試著有中意,
正式正來討,
𠊎看恁樣會有較好,
無斯討著个伯婆,
動啊著就講愛打脫事,
驚怕你會嚇到毋知愛仰仔正好哦。
伯公,
老牛食嫩草,
嬌妻斯難服侍喔!
就講你三餐服侍佢到像阿公,
佢還係會嫌你手藝㜮,
去大飯店食較好。
你係正經恁想討,
就愛煞煞去從師學煮食,
無斯日仔會艱辛過喔。
故所𠊎講啊,
伯公,
來參詳啊好無?
恁費氣个頭路莫恁好就有較好,
你做你打單身哥,
𠊎會請莊項个人,
較輒來摎你拜摎你求,
你日夜就會有頭路好做,
就毋會緊想愛討伯婆,
恁樣你看好抑毋好?
你想真兜仔,
加兩日仔𠊎正來跌筊仔哦。