校園肚个番檨樹
【圖/文/葉金華/永和國小老師】
發音人:葉金華(四縣腔)
吾學校停車場脣有一頭高天天个老番檨樹,經過多年个風霜,歸頭樹仔怕有四、五棧樓恁高,像巨人共樣企在該位,浸青个樹葉仔摎壯旺个樹椏就像係一枝巨無霸个遮仔,熱天做得抵日,寒天做得擋風。今年吾學校堵好愛過百歲生日,這頭老番檨應當摎學校共樣乜有百年恁老了。
初春時節老番檨樹个樹尾開了一杷杷、黃綠色細細蕊个花,無麼个香味,係講無探起頭來看,當難會去注意佢開花了。涼風吹呀過,開過个花就撥撥跌,跌到樹下滿哪仔都係,若係堵着落雨,涿到濕溚溚仔个花還會傳來略略仔臭沊个味緒,分負責拚掃工作个學生仔盡煩惱。
「阿姆哀喔!地泥恁難掃,仰仔掃乜掃毋淨哩!」學生仔異無奈何,拿等竹祛把趕時間煞猛拚掃。「地愛日日掃,田愛日日到喔!」先生恁仰形勸話學生仔,帶等小朋友在樹下共下整理。明明昨晡日正掃到淨淨俐俐个地方,正過忒一暗晡,就一哪仔都係落花摎樹葉仔,莫怪學生仔會在該位怨怪。看!垃圾桶一下仔就裝滿了,還重重鈂鈂仔當有份量。
樹項个花謝啊忒,跈等就打了當多青青个細番檨,在樹頂纜纜吊吊,風一吹就在該位晃來晃去。在印度文化,檨仔係愛情摎幸福个象徵。摎硬仃仃、還吂熟水个細番檨摘下來,削皮、對半切開,續下來摎中央个核挖忒,再將略略仔帶青色个果肉切做一條一條、拋鹽殺青、張到網袋仔肚䌈好,放在鑊仔肚用東西矺等過兩點鐘,續下來摎鹽洗忒了後再加冰糖,共下攪勻,等冰糖融化忒,就係酸甜好食又爽口个「情人果」。這歸頭樹仔个細番檨,怕做得做一大堆个情人果、分大家食到罅擺哩!
六月停課个時節,學校警衛分𠊎一隻番檨,佢講:「先生恁煞猛,停課還來學校無閒。這係學校老番檨樹打个,請你食看啊!莫看佢恁青,裡背肚囥了淰黃个果肉,食起來香甜又多汁喔!」𠊎摎該隻細番檨準點心食忒,摎核種到吾教室窗台項个花盆肚。新學期九月下旬,吾班項个學生仔問𠊎:「先生!花盆肚仰生了一頭新个植物?」𠊎看一下仔,就摎佢兜講:「這係細番檨个樹秧喔!看!佢个芽係對這隻恁大隻个核綻出來个。停車坪脣个該頭大番檨就係厥爺哀喔!」學生仔逐日摎花盆淋水,望等這頭細番檨有一日會像厥爺哀共樣恁大、恁高。
大自然有神奇个魔力,一隻細細个種仁,做得展現壯旺个生命力,總愛提供佢淨俐个泥肉、空氣、日光、水,佢就順等時間个腳跡開始生長。教育學生仔,也像園藝工作,愛用愛心守顧同陪伴,時節一到,就會花開滿園自然香喔!
(番檨樹个樹梗)
(小朋友拿竹祛把掃校園)