長字个討論
【文/范文芳/國立清華大學中國語文學系退休教授】
發音人:范文芳(海陸腔)
ㄧ 、字形結構
1. 古文長字,係象形字,上頭係頭頂毛髮長長,下背係彎腰持棍杖行路个樣貌。
2. 現代楷書形式,長無明顯个象形特徵。
3. 簡化後个長,更加無法認出當初表意象形字。
二、字意演變
1. 本意,象頭頂毛髮長長个老人家,係名詞,意指年紀大之長者。
2. 引申意,從年長之老人家,引申為社會上輩分、地位較高者,像長輩、長官,像兄長、家長、里長、鄉長、縣長、行政院長。此類用語都係名詞。
3. 引申意,從年歲長者再引申為時間、空間之久遠,從名詞演變為形容詞,如年長月久,指時間長久,長途旅行,指距離遙遠。
4. 引申意,從形容詞地位、距離、時間个長,再引申為動詞,有多餘之意,客語長無幾多時間,長無幾多錢。
三、客語常用个長字,在不同用法,有不同語音
1. chong陽平調,客語長短、長年、長尾鵲、長槓屋等,都係形容詞。
2. jhong陰上調,客語家長、村長、校長、縣長等,都係名詞。
3. diong陽平調,客語長幾多分鐘,長幾多錢,都係動詞。此用法又音chong陽平調。
四、感想
一般語言學者,都強調漢語係非形態語言,就字形來講,長字在不同用法,字形不變,詞性不同,字形還係無變,但係詞性有不同,字意就無共樣,還有,不同詞性、不同用法,語意會變,更重要个,字音會不同。
就長字个例來討論,字形相對來講,相當穩定,但係,因爭講法、用語不同,其字意就會變動,同時,連帶著字音也會有區別,故所對於台灣客語个漢字書寫,還係愛借用西方語法分析,正做得達到比較理想个解說。