福字顛倒 福氣到咧
──福字仰般會顛倒貼?
【圖/廖千慧;文/何石松】
發音人:何石松(海陸腔)
福日福時福地方 福來福到福傳芳
福天福地福山水 福人福氣福滿堂
一年容易又係虎虎生風介新年,在這春暖花開介好日仔裡背,大家一見面,少不了介,就係互相介恭喜祝福,毋係福如東海,壽比南山;就係五福臨門,千祥雲集,不論係聽著,或者係看著介,一定斯有福字,可見福字介重要,在農業社會,還可以看著:五福臨門,六畜興旺,連人摎動物也共下介祝福。
所謂五福臨門介五福,第一就係長壽,第二係富,第三係健康平安,第四係照道德做事,第五係高壽安詳過一生。原來一隻福字,所包含介範圍恁大,福字,多子多酒,多田多壽,難怪人類儘早就當好寫福字,還發展成百福圖,吾俚有恁多介福氣,仰做得毋好好珍惜呢
聽講,最慢在宋朝時節,就有人摎福字貼在門前,不過,有隻傳說,講門前貼福字,係在明朝朱洪武開始。有一年正月半,朱洪武也興蹀碟仔去遶街看花燈。無想著,看著一隻馬頭猴身介花燈,朱洪武就認定係百姓侮辱皇后馬娘娘,心肝想無摎這隻人㓾忒做毋得,但是,在這恁鬧熱介時節,實在不方便,就偷偷仔在這家人門口貼一隻福字做記號,等加下正派兵仔來捉人。
等到馬皇后知著皇帝愛捉人以後,就喊皇帝好歇睏咧。自家遽遽派兵仔星夜去到該條街路,傳知家家戶戶門口一定愛貼上福字,違者問斬,玄風之間,正經係「福窗福門福光照,福街福路福滿門」,滿天下都係福星目聶𥍉爧,目珠看著花花啊。等到第二日,官兵看著滿街都係福字,嗄無辦法捉人咧,所以,從此以後,家家屋屋都會貼福字。
也有人講,福字顛倒貼,係來自清朝恭親王府。一擺過年,王府大大細細都寫到當多福字,有個毋識字介,將該福字顛倒貼上去,恭親王無歡喜,大總管遽遽講:親王福到咧,這係好頭彩啊,難怪大家都講:「恭親王福到咧,福到唸千遍,金銀財寶堆歸遍。」恭親王一歡喜,就摎珍珠瑪瑙賞分該兜人,正經係福氣到咧,百福千祥啊!
在這下,新正年時,大年大節,還係愛祝福大家:「福來福到福星照,福多福旺福滿堂」,正經係福氣淰淰,淰盆淰缽;福氣到咧,金玉滿堂。
※本文的「介」為大眾通用的「的」,同教育部訂的「个」之意。