楊梅高山頂鄭屋見證楊梅開發歷史(上)
【文、圖/徐貴榮/國立中央大學客家語文暨社會科學學系兼任助理教授】
發音人:徐貴榮(四縣腔)
楊梅高山頂有一間當大當闊个雙堂屋,在梅高路210巷160號(原高山頂1號),前堂門面有九開間闊,係開發楊梅个鄭大模第四房傳下裔孫所起个大堂伙房屋。(圖1)
圖1 楊梅高山頂鄭屋前堂九開間,屋前闊闊个禾埕、半月池。(2014.07.29攝)
鄭屋來台祖鄭大模在康熙55(1716)年出世,雍正13(1735)年,二十歲就勇敢冒險,從廣東惠州府方郭都大安墟鄭屋寨單人獨馬過海來台,在北部登陸。因為後生時節爺哀就過身,分麼人扶養照顧長大,兄弟幾多,生活情形仰仔?無人知得。也無紀錄着厥爺哀个名姓,大模公早期个行踏歷史,故所後代子孫就以大模公為第一世。
大模公來台過後,同一般人共樣,想愛尋一隻地方先安身,聽講「楊梅田寮仔暫時做得安身,營盤腳做得樂歲」,就決定來這求發展。因為係單人獨馬、無親無戚,來到桃澗堡北勢庄張屋个時節,高不將先同張屋人做長年,駛犁耕田、開荒墾地,煞猛做事。好得有砸磳个身體,刻耐个精神正做得落去。做欸二十年,逐日早出暗轉,無怨無嘆,一生人个青春歲月就恁樣賣分張屋。毋過因為煞猛篤實、認真和謙、待人處事這兜,深深受着頭家个欣賞同歡喜,就想將正十六歲个妹仔嫁分佢做餔娘。當時大模公想着自家年過四十,又無長錢,「深恩吂報,哪敢討千金」?毋多敢答應這門親事,無想着頭家還喊媒人勸佢,佢正答應這門親事。
無論如何,佢仰仔就想毋着過忒「不惑之年」還做得在這「成家」,毋單止恁樣,還係大頭家个婿郎,來台个第一目標「成家」達着吔!成家過後,在生活上總算安定下來吔!就想愛「立業」。在張屋做加幾年,佢就同丈人老講自家來臺灣个志願,想愛到別位開創自家天地个構想。還較無想着該係,丈人老毋單止對佢無半點受氣,也無半滴怨嘆,試着這隻婿郎恁有志氣,心肝肚十分歡喜,就將在楊梅壢幾下百甲个土地送分佢,做為創立家業个根基。這天頂跌下來个禮物,佢仰會毋暢?毋過這兜所在,雖然係還吂開墾个荒野,佢相信總愛煞猛、肯做,就會有好个將來。準備好勢,就辭別丈人老,帶等餔娘前去開荒打林,來到當年佢想愛到个楊梅壢營盤腳所在。
丈人老分佢恁闊个土地,主要係在水尾仔、隘口寮、月眉山下、高山頂、三湖這兜所在。初到此地,就選背向高山頂个隘口寮起屋安身,並從這開始開墾。楊梅壢个開發,在臺灣開發歷史上,大約到乾隆後期正有大量開發,算係較慢个。鄭大模離開北勢張屋到這開墾,實際扮演當重要个開荒腳色。《桃園縣志》〈志略篇〉也有寫着:「至乾隆50年,始有政府顧問有、朱、溫姓人家獲當局許可,組織開拓機構,名『諸協和』,著手開墾,並派鄭大謨(模)、黃燕禮為佃首,經營墾務。」毋過根據楊梅鄭氏族譜个紀錄:大模在乾隆45(1780)年2月21日,65歲就過身吔!同桃園縣志个記載鬥毋着,在鄭氏族譜也無寫着佃首這件事,可能有兜仔誤差,毋過鄭大模開墾楊梅高山頂到營盤腳這一大片个土地係事實个。在無水、無錢、無機器个時代,愛全用雙手、钁頭開田作陂,愛用擔竿、畚箕來㧡,逐日過个係咬薑啜醋、早出暗轉个日仔。經過兩公婆个同心合力,煞猛打拚,當多年過後,變到當地个大戶人家。也怕係因為忒煞猛个工作,操勞過度,鄭大模在65歲就過身吔!後代子孫經過煞猛勤儉、刻苦耐勞个精神,堅持毋賣家業,經濟正慢慢仔改善,經過150年正才完成開發。(吂完待續)
※本文的「着」,同教育部訂的「著」之意。