美好花生
【文、圖/薛常威/國立中央大學客家語文暨社會科學學系在職專班碩士】
發音人:薛常威(四縣腔)
鳳林係花蓮一個當靚个小鎮,當多係自台灣西部徙過去个客家人,共樣有保存耕讀傳家个傳統,鳳林个子弟乜當會讀書,培養出百過個校長,故所鳳林分人講係校長夢工廠。
「美好花生」就在鳳林,創辦人因為想愛摎阿姆炒番豆个味緒傳下去,渡等餔娘共下回轉故鄉,自認識番豆開始學起,挑選好个番豆,知講仰般形炒,炒出一盤鹹香酥脆,簡單美味,好食个鹹酥番豆仁,續等開發出當多優質个產品。傳承自家族个客家文化,「美好花生」也將客家元素應用在包裝上,像牛車个車輪、牽牛花摎客家花布,分人感受著滿滿个農村印象,提醒後生人毋好毋記得自家个傳統文化。
使用在地生產,一年兩期个番豆,自栽種、採收到倉儲个品質管理,產銷班个成立,分番豆產業个未來有好个經濟成長,通過一群人个力量,穩定个加工需求,農產做得做到在地耕作、保證價數賣出,分農業生產有較穩定个未來,「美好花生」除忒傳承手藝之外,還對農村發展有更加美好个願景。
除忒穩定提供好品質个番豆,鹹酥番豆仁之外,也陸續開發當好評个伴手禮番豆醬摎番豆油等新產品,乜有提供來店享用个番豆湯。
「美好花生」毋係單淨提供好食个番豆,現場乜有好搞个藝文空間。這位提供一年四檔个展覽,透過生活工藝、飲食文化、甚至文學、音樂、戲劇摎任何型態个藝術主題,期待農業摎藝術兩者做得輕鬆自然在日常生活中感受著,來到鳳林小鎮這純樸个農村肚,食農摎藝術做得產生精彩个火花。