虎年卵語
【文、圖/彭欽清/國立政治大學退休教授】
發音人:彭欽清(四縣腔)
舊年寒天以來,臺灣个中北部都買毋得著卵,同兩三年前買嘴落仔、衛生紙个情形有挷,媒體講這係卵之亂。
吾倈仔過年載心臼過孫仔轉高雄妹家,順續仔買一箱卵轉來,有个自家食,有个送老鄰舍,對門个老伯姆暢到耐毋得,講附近仔个店仔尋交了都買無,緊講佢愛省省仔食。𠊎聽了,就愐起原在人愛食粒雞卵還較無恁該。
還細該下,見雞嫲生卵,吾姆就會遽遽去拈起來,放在眠床下,等到有十過兩十粒仔了,正放在雞塒角个竇項分雞嫲孵。孵有成禮拜仔,愛拿起來在日頭下抑用電火晟,看卵係精抑冇,精个再過孵,冇个煎蘿蔔絲食。
等孵到兩禮拜過,愛沾卵,裝好半面盆半燒冷个水,同竇項个卵輕輕仔放到水項,會停動个放一片,捽燥來放轉竇項再孵,毋會个放一片,吾姆講係半槽米,聽講已補,毋過佢毋敢食,就分鄰舍好个人。
原在人个雞卵大體拿來孵雞子,盡少拿來食,下擺仔會煎分老人家做私菜。有親戚鄰舍無華麗,會拿幾粒仔卵來送佢。細人仔無卵好食,會同大人搉忒个卵殼焙卵衣仔來食,罔過願啊。
吾爸有四兄弟,一個阿姊,吾姑座大,從細仔愛𢯭渡老弟,打早就愛䟘起來煮飯,好分老弟食飽朝,行點過鐘个路頭去到學校。佢自家無讀著書,一生人歇在八燕坑山項,老弟浪花四散,吾伯歇三叉,吾爸過細叔歇大湖,三叔歇蘇澳。毋過,逐年都會轉八燕坑掛紙,去吾姑屋下食晝。
吾姑盡惜老弟,有麼个好食个,就會拿分佢這兜。佢食到九十三歲正過身,三個老弟比佢先走,毋敢分佢知,佢係有問講恁久無看著麼人,吾表仔就會應講人無暢快抑無閒。
吾細叔過身个第二年,大家去掛紙,佢問講:阿瑞仔仰無來?吾叔姆應佢講人無鬆爽。吾姑就行去間肚拿出一細紙絡仔个雞卵,塞分吾叔姆講:這幾粒仔卵分阿瑞仔食。害吾叔姆遽遽斡轉頭來緊跌目汁。
半夜無想著,農業恁發達个臺灣講有恁多人會買無卵好食。當買毋著衛生紙該央時,行政院長个面書寫講一儕人正一隻屎窟毋使恁會捽,喊大家莫買恁多,還合一張屎窟个圖。
這擺恁多人搶等買卵,院長个面書乜應當愛同百姓講:一儕人一張嘴定定,無幾會食,毋使搶。還過愛合一張嘴个圖,百姓較聽得入耳,係講嘴項又塞一粒像雞卵又像麼个屁卵个卵,該怕會餳還較多人來看正著。