獅頭鵝好做伴
【黃美貞】
發音人:黃美貞(四縣腔)
朋友送阿爸一對獅頭鵝,該鵝仔个形投仔同一般个鵝仔生到無麼个共樣,連性體都特別活潑,還愛䟓工挖一个水池分佢兜洗身仔。
講着獅頭鵝,生來當大骼,係一般鵝仔个兩三倍大,盡打眼个係額頭項有一矻肉瘤,看起來像肉丸,華語講獅仔頭,故所厥名仔就恁仰來个,落落个蛤蟆胲乜同一般个鵝仔無共樣。阿爸講:「獅頭鵝罕得有人畜,雖然鵝肉食起來甜又毋會臭臊,毋過當打粗食量大,生个卵少合會賴孵,係大量養殖斯算毋和,故所較罕得有人畜。」
畜鵝仔鴨仔定著愛分佢搞水,因為佢兜好淨俐,搞水該下會用嘴來整理鵝毛,長長个頸根一下仔交過來吮翼胛,一下仔又吮尾;成時心情好,還會倒頭種,兩隻鵝蹄在面頂蹬來蹬去,鵝頭在該沒水;有時歸身仔沒在水肚,泅遽遽一路過,一下仔又跋䟘起來,躡等腳尾,翼閕閕仔緊撥,摎翼撥燥水,抽胲大聲叫,一群泅忒又換一群,生趣到奈毋得。水池个水係汶忒了,佢兜就毋會落去洗身,一直愛等到主人換過淨水。
鵝仔愛食青,故所挑挑種一廂菜地,全部係白蕒仔,鵝仔還細該下,愛用菜刀切較幼兜仔,等到變鵝豚該下,就歸抓仔攉到鵝寮就做得,由在鵝仔搶食,成時無蕒仔,割兜仔牧草、蔥尾蒜尾乜做得,食青个鵝仔消化好,吸收好,自然較遽大。記得做細人仔个時節,最好抔菜蓋去分鵝仔食,看佢兜吮菜个樣仔,一路呷等上,手指愛細義,毋堵好時會分佢兜个嘴呷着。係堵着生份人行兼,鵝仔會摎頸根放低,一路逐等來,命就會嚇冷。
對阿爸來講,畜雞畜鵝係生活个趣味,打幫這對獅頭鵝來做伴,逐朝脣臨暗仔去巡巡啊,看顧這兜頭牲,日仔加異遽過,心情乜特別好。