來到香檳
【文、圖/鍾榮富/南臺科技大學應用英語系講座教授】
發音人:鍾榮富(南四縣腔)
「該碗麵」食了以後,十一月公布留學考試錄取名單,下二年八月就愛出國。期間愛考托福,愛準備GRE,愛申請學校,愛辦護照。這兜雜事,現代有google,有網路,一查就知。該央時,麼个都無,連愛讀麼个都毋清楚,雖然考个科目係「特殊教育」,𠊎對教育實在無興趣。問了學校愛个職缺後,開始申請各大學个語言學研究所。
資訊封閉个時代,美國各州个所在,都還無麼个了解。還記得,去到高雄美國新聞處探問,正知得所有个學校申請資料都放啊在三民國中圖書館。行入圖書館,美國學校个清冊、申請个時間、要求、申請費用等等排到三大櫃,刊印个字十分細隻,光線又淡暗,足足查了兩日,正有息把概念。原來美國學校有公私立兩個系統,大體講來,私立學校申請費、學費、生活費都貴。公立系統个學校,排名前後差別盡大,但係申請費、學費、生活費都比較過便宜。
七零年代,台灣个外文系有了顏元叔博士,帶入新批評理論,切入現代文學,風靡全國。報紙副刊打鑼吹簫,有兜文人學者像劉紹銘、傅孝先等等个文章親切,對英美文學个介紹同分析,深入淺出,影響盡大。這三儕都係威斯康辛大學陌地生(Madison)出身,𠊎心中自然對陌地生帶有無限个想像。故所在選大學个時節,優先選陌地生。第二个考量係伊利諾大學香檳校區,主要係受着彭歌个「從香檳來个」影響。又聽著當時台大校長錢思亮、淡江校長張建邦等都係伊大个博士。檳校區个語言學(1980-85)排名全國第九或者第十,還算好个選項。當然還申請了其他三所學校。等到五六月,各校个通知陸續寄來。最早來个係伊利諾,但係淨一紙通知,無寄J-1 (愛這文件才能申請出國程序)。J-1來得最遽係威斯康辛陌地生校區。其他學校本來就候補定定,有無錄取並無麼个在意。
拿等威大的J-1去辦好了所有个出國手續,已經係七月底了。有一日,同時來了兩封信,一封係威大台學生為了預備去讀書个新生做簡介个活動,另一封就係伊大个J-1。𠊎參加了威大同學會,專攻語言學个學長,第一句話就喊𠊎莫去,該位个語言學十分難讀。對台北歸來,無麼个心思再想陌地生了,回頭再詳細看伊大个介紹,忽然有了溫暖。當下,就決定改去伊利諾讀書。
1986年,八月初六當晝,坐了華航班機,離開台灣。當日半夜,𠊎來到香檳機場。雖然已經八月了,天時還係清涼,冷風陣陣,吹到𠊎雞嫲皮起澎。就恁仔,𠊎來到香檳。