正月半拜天公 拜了年年鬆
正月半拜天官 拜了日日安
【圖/廖千慧;文/何石松】
發音人:何石松(海陸腔)
正月半拜天公,拜了年年鬆,意思係講在大年大節介正月半,當虔誠介拜了天公等神明以後,體會民族生命延續介重要,人力毋會接續毋著,就會像「開捆棉花──一身鬆」共樣,毋單淨物質輕鬆,精神輕鬆;日日豐湧,年年月月都鬆容,正經係燈花心花共下開,光明前途照等來。該正月半到底係麼介日仔,有恁大介法力呢?
因為正月半係天官介生日。記得頭擺世大人輒輒會講,正月半愛去大廟燒香許福,尤其愛去敬三界爺,希望能夠接受天官介賜福。所以,又講「正月半拜天官,拜了日日安」。三界爺就係天官,地官摎水官。聽講天官就係堯,堯這隻人,佢介仁心像天恁大,智慧通於神明,非常痛惜百姓,教百姓照等天象變化介方法,來觀察日月星辰,來掌握耕種介時節,受著大家介支持擁護,難怪孔子都安腦佢像天恁樣偉大,實在不得了啊!天官,係仰般介愛護人民呢,所以,正月半在佢生日介時節來拜天官,拜了心肝肚斯會試著日日安。難怪頭過見擺看著屋下人在廟項轉來,心情特別輕鬆。
其實,不管係拜天公會年年鬆,抑係拜天官日日安,全部都係對天地自然介一種飲水思源,係講能夠在一年開始介正月半來感恩摎許福,該斯會像「豆渣落水──歸身鬆」共樣,因為,客家禮俗教吾俚愛,一拜天地覆載恩,二拜日月照臨恩,三拜山林水土恩,四拜爺娘養育恩。恁堵好在這月圓人圓介正月半,係最適當介日仔,除了以上對天公天官等神明介感謝以外,對日月照臨介溫暖,山林水土介滋補,長存感恩,對自家介身體來源,也愛摎佢傳下去,斯像走追仔介接力共樣,係一種民族生命介傳承,利用花燈介光明,象徵人丁介興旺,代代相傳,幸福安康,心情正會輕鬆。
所謂拜了天公天官後會日日安,係一種表象介講法,實際意義係對天地介虔誠尊敬,做人愛實在,愛專心誠意,做事愛煞猛打拚,所以,正月半拜天官介意義就係發揚人間介真情,對人愛有真心真意,可以隨時對天表明。客家歌謠〈十二月古人〉介正月,該王十朋摎錢玉蓮,佢兩儕係恩愛夫妻,可惜一直無辦法團圓,尤其係佢兩儕聽講對方已經過身介消息以後,還在逐年正月半,去大廟為對方許福,希望能夠再過見面,正經係千般心,萬般愛介金石情,感動人心啊!所以,正月半係一隻多情介日仔,當吾俚拜了天官等神明以後,了解正月半係摎人許福介日仔,斯像拿香花送人,歸手都花香,心情係毋係較安然鬆爽兜仔。
正月半又係代表團圓,互相尊重介日仔。因為,正月係一年介第一隻月,正月半係一年裡背第一隻月圓,暗晡頭又有滿街介花燈。在頭擺,正月半拜好天官以後介暗晡,所有介細妹仔都會自由去看花燈,所謂「姑嫂看燈」,毋單淨代表人際和諧,還代表民族命脈介希望。燈,摎丁客語共音,代表光明,人丁興旺,家家燈籠都點燈,斯像家家都出丁,所以姑嫂著等綉羅裙,在迎龍撐獅,八音響無停,鬧熱介暗夜,共下看該紅羅花色靚靚介花燈,看該八仙飲酒燈,金童玉女燈,五子登科燈,七子八婿燈,還有該龍鳳並鴛鴦,金雞對鳳凰;更有該童子拜觀音,織女對牛郎等,正經係金晶爧,張燈結綵鬧洋洋!
恁快樂介正月半元宵夜,人人都希望能夠闔家平安,財丁兩旺,使得民族生命源遠流長,男女龍鳳呈祥,五世其昌;百子千孫,金玉滿堂;天官賜福,豐豐湧湧;年年月月,鬆鬆容容。自古到今,從來毋識發生少子化介國安危機,正月半,正經係民族生命介日吉時良,最靚介日仔!
所以講,正月半拜天公,拜了年年鬆;正月半拜天官,拜了日日安啊!
※本文的「介」為大眾通用的「的」,同教育部訂的「个」之意。