鳥居米穀店
【文、圖/薛常威/國立中央大學客家語文暨社會科學學系在職專班碩士】
發音人:薛常威(四縣腔)
花蓮鳳林鎮在日本時代係官辦个一個移民村,日本人募集當多苗栗新竹个客家人來這鳳林種菸草,故所鳳林算將係台灣這下保留最完整菸樓聚落个所在。
日本時代官辦移民村安到「林田移民村」,井字形个街路當整齊,菸樓、神社、老屋見證以前鳳林个繁華,在鳳林還做得看著1914年興建个林田警察官吏派出所,這位也有一間古老个「廖快菸樓」。
徐穗堆廖快菸樓,煙囪凸出屋頂,當高大,算係大阪式菸樓,日本時代起个,該下菸葉分人講係綠金,係經濟價值當高个作物,毋過這下鳳林个菸田早斯無忒。菸樓由客委會補助整理、活化再利用,這下係菸樓聚落保存个工作站,也提供客家風味餐點、徐媽媽番瓜糕、豆腐乳DIY、自然麴手工豆油DIY个所在。
「鳥居米穀店」負責人乜係菸樓个徐家人徐明堂,佢講:農家人最重要个工作就係認識土地,慢慢體會在田中種个係自家个心,平安个未來摎共享一坵田个福氣。對鳳林這片土地有當深个感情,遵從一年个節氣,種出美味健康个有機黃豆、烏豆、米摎多樣釀造个產品。
佢兜在鳥居農場種植基地,用負責任个態度,將種子種在安全个土地裡背,除忒分大家前來學習親近、友善土地,體驗耕種个趣味,更加希望在逐擺播種个四個月後,毋係單淨收成,乜毋係簡單个金錢交易,係分大家得著還較多个希望、信付、健康摎共同个未來。
在廖快菸樓這位,也有舉辦釀造職人專班,教大家自種烏豆開始,煮烏豆,養麴、發酵、醬汁熬煮,一點一滴尋轉阿婆个老味續。另外,也有提供客制化个手作體驗導覽。
下二擺來鳳林,愛記得來這客家菸樓行行看看,順續來食美味个客家料理。