百年戶籍謄本个密碼
【文、圖/彭欽清/國立政治大學退休教授】
發音人:彭欽清(四縣腔)
前一駁仔,吾四哥揙出一張吾公分戶時節請个戶籍謄本,裡肚囥有當多𠊎這兜毋知个信息。毋過,謄本係1908年出个,解讀起來已食力,𠊎就拜託張正田教授𢯭手。
張教授係苗栗市人,政治大學歷史系博士,對臺灣个地方史已有研究,現下在大陸个龍岩學院教。佢講日本手仔20世紀初仔整理臺灣人个戶籍資料,1895年以前个年號,日本人總下改到日本紀年,毋承認清代紀年。打幫佢𢯭手,過自家從細仔聽著有關老輩仔个種種事情,𠊎正有法度同祖先个資料較正確个來解讀。
吾來臺祖係22世,歇竹東。23世就因爭土地毋罅耕,東徙西徙徙到苗栗銅鑼,23、24世个風水尋毋著。
吾太26世,有一暗晡在大寮坑掌工寮,分原住民用尖个槓仔鼓著著傷,轉到屋下過身。吾伯公就同吾婆太講佢出外去賺錢,喊吾婆太帶等吾公在屋下耕種就好。
等到兄弟仔兩個先後結婚有後代,吾公帶等吾婆太過子女到大湖水頭寮做佃農,吾伯公彭阿臺無降,吾伯過房分佢,揇一個妹仔,佢這桍留在八燕坑,就係謄本肚項个新雞籠32番地。
吾公彭琳強,明治10年,清光緒3年(1877年)11月初2出世,明治41年(1908)5月22日在三叉河戶政機關完成分戶登記,寄籍在大湖庄387番地溫而理个屋下,係吾伯婆个房頭內人。民國35年(1946)𠊎三歲該年吾公轉家。
吾婆太古丙妹,日本仁孝天皇(明治天皇个阿公)天保7年(1836)5月26出世,清道光16年,在日本孝明天皇(明治天皇个阿爸)安政四年(1857)四月二十日,清咸豐7年,嫁入彭屋。厥外家歇在苗栗一堡橫坑庄,應該係銅鑼三義西湖該搭仔人。吾姆講吾婆太係在吾大哥出世該年,民國16年(1927),過身个,照人算係93歲。
吾婆曾對妹个外家在苗栗一堡九湖莊,係這下銅鑼鄉个九湖,小地名圓潭仔。佢在清同治13年(1894)6月初2,明治7年,出世。明治35年(1911)嫁到彭屋,7月初2在戶籍機關完成婚姻關係登記。吾姆講佢嫁到彭屋該年吾婆就過身。還記得還細該下,同圓潭仔个舅公有麼个好歪事還有行。阿妹舅公這房搬到獅潭鹹水坑,行還較近。
根據謄本,吾公有揇一個細心臼仔(花囤女),彭王瑞英,愛分吾三叔對个(緣女),厥親生爺哀係苗栗一堡北勢窩人,佢係明治40年(1916)出世个,係庶子,就係阿姆毋係正式討个,兩歲就分吾公揇來八燕坑,北勢窩在通霄兼銅鑼个山皮仔項,離八燕坑有好遠仔。仰會分到恁遠?同厥姆姓彭有關係無?這下無哪好問起勢了。吾餔娘个來臺祖乜歇在北勢窩,講客,後代仔搬到海脣,客話就攉淨淨。
背尾吾三叔討共樣在山項焗腦个叔姆,無對成,吾英姑就嫁分水頭寮个耕大份田个張屋人。吾姆講:若英姑盡衰過,毋知自家个爺娘歇在哪,吂識轉去過,若姑丈又恁早過身,愛一儕渡大兩个倈仔一個妹仔。
原在掛紙,風水多穴,長者有機會同後生人講掛个係麼人過佢一生人重要个事蹟,這下人大體就放在公家抑私人个塔項,掛掃个日仔又較集中,各姓人就有,長輩个人較無機會同後生人紹介祖先,就講有機會,乜怕無幾多个後撐仔聽得入耳。